wafa ki rah mein luTte hain qafile kaise

vafā kī raah meñ luTte haiñ qāfile kaise

vo ham se toḌ ke jaate haiñ silsile kaise

kabhī bhī ham se shikāyat nahīñ rahī un ko

to phir ye dūriyāñ kaisī haiñ fāsle kaise

tum apne dil meñ kisī kā ḳhayāl mat paalo

mire raqīb ye dete haiñ mashvare kaise

na din meñ chain na rātoñ meñ niiñd kā pahlū

rah-e-firāq meñ aate haiñ marhale kaise

amīr-e-shahr bhī zālim se ho gayā mar'ūb

hamārī qaum ke hal hoñge mas.ale kaise

ham ahl-e-dil haiñ nasīhat nahīñ sunā karte

ham ahal-e-'aql se rakkheñ bhī rābte kaise

hameñ to 'ishq meñ luTnā thā luT ga.e 'shāyān'

kamāl-e-husn baḌhātā hai hausle kaise

wafa ki rah mein luTte hain qafile kaise

wo hum se toD ke jate hain silsile kaise

kabhi bhi hum se shikayat nahin rahi un ko

to phir ye duriyan kaisi hain fasle kaise

tum apne dil mein kisi ka KHayal mat palo

mere raqib ye dete hain mashware kaise

na din mein chain na raaton mein nind ka pahlu

rah-e-firaq mein aate hain marhale kaise

amir-e-shahr bhi zalim se ho gaya mar'ub

hamari qaum ke hal honge masale kaise

hum ahl-e-dil hain nasihat nahin suna karte

hum ahal-e-'aql se rakkhen bhi rabte kaise

hamein to 'ishq mein luTna tha luT gae 'shayan'

kamal-e-husn baDhata hai hausle kaise