جیسے مریضِ غم کوئی، ہو چارہ گر کے سامنے

جیسے مریضِ غم کوئی، ہو چارہ گر کے سامنے

میں تجھ کو دیکھتا رہوں، تو ہو نظر کے سامنے

محرومِ دو جہاں ہے وہ جو تجھ سے بے خبر ہوا

اپنی خبر نہیں ہے کچھ، تیری خبر کے سامنے

جب تک ہیں جاری دھڑکنیں، جب تک رواں ہے میرا دم

تب تک میرا قیام ہے، تیرے ہی در کے سامنے

جو بھی ہیں میرے دل میں غم، تجھ کو سناؤں میں صنم

تیرے سوا نہ ہو کوئی، دیدۂ تر کے سامنے

میری یہ بے بسی مٹے، میری یہ بے کلی مٹے

تو بھی اگر ہو جلوہ گر، دردِ جگر کے سامنے

تیرا سراپا ہے حرم، سجدے کروں نگاہ سے

تیرا جو پائے ناز بھی، آ جائے سر کے سامنے

دیکھوں فنا کے بعد بھی، اس کو سکونِ جاں ہے جو

شایانؔ تیری قبر ہو، اس کے ہی گھر کے سامنے