tere hijr ka ye sila mile mujhe to nahin to KHuda mile

tire hijr kā ye sila mile mujhe to nahīñ to ḳhudā mile

jo sanam mile to sanam mile jo ḳhudā mile to ḳhudā mile

ise rāh-e-haq pe chalā diyā use rāh-e-haq se haTā diyā

ye ḳhudā kī marzī kī baat hai kise kyā vo de kise kyā mile

kise māl-o-zar se navāz de kise faqr-o-fāqe pe Daal de

ye usī ke dar ke haiñ faisle usī dar se sab ko milā mile

yahī rut hai saare jahān kī yahī baat us ne bayān kī

jo vafā karo to vafā mile jo daġhā karo to daġhā mile

jise dil kī baat batā.ī thī jise raah shab meñ dikhā.ī thī

vahī mujh se bichhaḌ ke chalā gayā use ab na kisī se vafā mile

koī naam tak na batā sake koī raah tak na dikhā sake

vo jo aa.e kal mujhe DhūñDne na dishā mile na pitā mile

hai 'hasan' maqām-e-tashakkurī jo milī hai dil kī tavañgarī

use ḳhālī haath na bhejiye jo kisī kī dar pe sadā mile

tere hijr ka ye sila mile mujhe to nahin to KHuda mile

jo sanam mile to sanam mile jo KHuda mile to KHuda mile

ise rah-e-haq pe chala diya use rah-e-haq se haTa diya

ye KHuda ki marzi ki baat hai kise kya wo de kise kya mile

kise mal-o-zar se nawaz de kise faqr-o-faqe pe Dal de

ye usi ke dar ke hain faisle usi dar se sab ko mila mile

yahi rut hai sare jahan ki yahi baat us ne bayan ki

jo wafa karo to wafa mile jo dagha karo to dagha mile

jise dil ki baat batai thi jise rah shab mein dikhai thi

wahi mujh se bichhaD ke chala gaya use ab na kisi se wafa mile

koi nam tak na bata sake koi rah tak na dikha sake

wo jo aae kal mujhe DhunDne na disha mile na pita mile

hai 'hasan' maqam-e-tashakkuri jo mili hai dil ki tawangari

use KHali hath na bhejiye jo kisi ki dar pe sada mile