ab to wafa ke nam ka charcha nahin raha

ab to vafā ke naam kā charchā nahīñ rahā

apnā thā jo zamāne meñ apnā nahīñ rahā

dekhā jo ik za.iif kī lāchārgī kā haal

mujh ko mire nasīb kā shikva nahīñ rahā

vā'de hazār kījiye aur bhuul jā.iye

vā'doñ pe ab kisī ke bharosā nahīñ rahā

tū ne bhī mujh ġharīb ko dil se bhulā diyā

mujh ko bhī tere 'ishq kā sadma nahīñ rahā

sajde meñ sar hai aur ḳhayāl-e-jahān-e-yār

yā'nī ki ab ḳhushū’ kā sajda nahīñ rahā

vo ruuTh kar gayā hai to rūThī hai kā.ināt

lagtā hai ab to koī hamārā nahīñ rahā

'shāyān' jis ko raaz batā.eñ to chup rahe

koī bhī is jahān meñ aisā nahīñ rahā

ab to wafa ke nam ka charcha nahin raha

apna tha jo zamane mein apna nahin raha

dekha jo ek zaif ki lachaargi ka haal

mujh ko mere nasib ka shikwa nahin raha

wa'de hazar kijiye aur bhul jaiye

wa'don pe ab kisi ke bharosa nahin raha

tu ne bhi mujh gharib ko dil se bhula diya

mujh ko bhi tere 'ishq ka sadma nahin raha

sajde mein sar hai aur KHayal-e-jahan-e-yar

ya'ni ki ab KHushu’ ka sajda nahin raha

wo ruTh kar gaya hai to ruThi hai kainat

lagta hai ab to koi hamara nahin raha

'shayan' jis ko raaz bataen to chup rahe

koi bhi is jahan mein aisa nahin raha