ishq par rok nahin qalb pe ilzam nahin

'ishq par rok nahīñ qalb pe ilzām nahīñ

'aql vāloñ kā rah-e-shauq meñ kuchh kaam nahīñ

mujh ko dīvāna samajhte haiñ jo dīvāne haiñ

un ke hañsne pe du'ā dījiye dushnām nahīñ

terī mahfil kā ye dastūr 'ajab hai saaqī

lazzat-e-husn nahīñ raqs nahīñ jaam nahīñ

aisī tasbīh ke paḌhne kā sila mat māñgo

jis meñ kuchh soz nahīñ saaz kā paiġhām nahīñ

ham to 'ushshāq haiñ 'ushshāq kī duniyā kyā hai

raat ko niiñd nahīñ sub.h ko ārām nahīñ

merī tā'rīf meñ ai dost qasīde mat paḌh

merī ḳhūbī to yahī hai ki mirā daam nahīñ

jo bhī kahte haiñ vo 'shāyāñ' unheñ kahne do

kaun majnūñ hai jo is raah meñ badnām nahīñ

'ishq par rok nahin qalb pe ilzam nahin

'aql walon ka rah-e-shauq mein kuchh kaam nahin

mujh ko diwana samajhte hain jo diwane hain

un ke hansne pe du'a dijiye dushnam nahin

teri mahfil ka ye dastur 'ajab hai saqi

lazzat-e-husn nahin raqs nahin jam nahin

aisi tasbih ke paDhne ka sila mat mango

jis mein kuchh soz nahin saz ka paigham nahin

hum to 'ushshaq hain 'ushshaq ki duniya kya hai

raat ko nind nahin subh ko aaram nahin

meri ta'rif mein ai dost qaside mat paDh

meri KHubi to yahi hai ki mera dam nahin

jo bhi kahte hain wo 'shayan' unhen kahne do

kaun majnun hai jo is rah mein badnam nahin