jo dil nashad ho tum se lage to shad ho jae

jo dil nāshād ho tum se lage to shaad ho jaa.e

jo tum se 'ishq kar baiThe to phir ābād ho jaa.e

jo tum se duur hai āzād ho kar bhī muqayyad hai

jise tum qaid kar lo bas vahī āzād ho jaa.e

vo shāhoñ ke mahal meñ DhūñDhte haiñ ’izzat-o-rutba

tirī chaukhaT pe jo aa jaa.e vo dil-shād ho jaa.e

nigāh-e-yār kī tāsīr kā kyā ḳhuub jalva hai

tumhārā ḳhosha-chīñ bhī mulk kā ustād ho jaa.e

vo dil jis meñ junūñ ho shauq ho lazzat ho duniyā ho

vo dil tum se lage to maḳhzan-e-aurād ho jaa.e

jo un ke dar pe aa kar raqs karatā hai vo dīvāna

piye jab 'ishq kī mai sāhib-e-irshād ho jaa.e

yahāñ par 'ishq kī manzil baḌī mushkil se miltī hai

koī majnūñ koī rāñjhā koī farhād ho jaa.e

'hasan' merī tamannā hai ki maiñ bhī maiñ na rah jā.ūñ

mirā dil dil na ban paa.e to phir barbād ho jaa.e

jo dil nashad ho tum se lage to shad ho jae

jo tum se 'ishq kar baiThe to phir aabaad ho jae

jo tum se dur hai aazad ho kar bhi muqayyad hai

jise tum qaid kar lo bas wahi aazad ho jae

wo shahon ke mahal mein DhunDhte hain ’izzat-o-rutba

teri chaukhaT pe jo aa jae wo dil-shad ho jae

nigah-e-yar ki tasir ka kya KHub jalwa hai

tumhaara KHosha-chin bhi mulk ka ustad ho jae

wo dil jis mein junun ho shauq ho lazzat ho duniya ho

wo dil tum se lage to maKHzan-e-aurad ho jae

jo un ke dar pe aa kar raqs karata hai wo diwana

piye jab 'ishq ki mai sahib-e-irshad ho jae

yahan par 'ishq ki manzil baDi mushkil se milti hai

koi majnun koi ranjha koi farhad ho jae

'hasan' meri tamanna hai ki main bhi main na rah jaun

mera dil dil na ban pae to phir barbaad ho jae