مری دھڑکنوں میں بسا ہے تو، مرا تجھ پہ دار و مدار ہے

مری دھڑکنوں میں بسا ہے تو، مرا تجھ پہ دار و مدار ہے

تو ہی میرا صبر و قرار ہے، تو میرے چمن کی بہار ہے

جو تری نظر میں ہوں پر خطا، جو تری رضا ہو تو دے سزا

مرے شوق کا ہے یہ سلسلہ، ترا در ہے تیرا دیار ہے

تری بے رخی کا ملال ہے، تو ہی فکر ہے، تو خیال ہے

تیری ذات ہی پہ تو منحصر، مری زندگی کا حصار ہے

مرے عشق کا تو جنون ہے، تری دید میرا سکون ہے

مرے روبرو تو نہ ہو اگر، نہ سکون ہے نہ قرار ہے

تری سمت سے جو ہو بے رخی، تو ہے رائیگاں مری ہر خوشی

مرے واسطے تو ہر اک خوشی، ترا عشق ہے ترا پیار ہے

مرا ایک پل بھی نہ ہو بسر، میں بچھڑ کے تجھ سے جیوں اگر

مری موت کا نہ بنے سبب، یہ جو ہجر مجھ پہ سوار ہے

جو پلا گئی ہے تیری نظر، اسی جام کا تو ہے یہ اثر

مرے ذہن و دل میں بھی آج تک وہی نشہ ہے وہ خمار ہے

جو حسنؔ کہے اسے چھوڑیے مگر اس کے دل کو نہ توڑیے

یہ وفا کا درسِ عظیم ہے، یہی چاہتوں کا شعار ہے