jism se nikli to pahunchi ka’ba-e-maqsud tak

jism se niklī to pahuñchī kā’ba-e-maqsūd tak

be-libāsī ban ga.ī hai jāma-e-ehrām-e-rūh

do hī din meñ naujavānī rañg-e-pīrī lā.egī

ai jahān-e-jism ik din sub.h hogī shām-e-rūh

soz-e-ġham se āb-o-ḳhāk-o-bād haiñ ātish-mizāj

chaar unsur kā banā chaumukh charāġh-e-ḳhām-e-rūh

koī to jān-e-jahāñ mehmāñ sarā-e-dil meñ hai

dam-ba-dam pahuñchāte haiñ paik-e-nafas paiġhām-e-rūh

ḳhūb-rūoñ ko zarar pahuñchā sake kyā inqilāb

huur ho jaa.e jo likkhe koī ulTā nām-e-rūh

lo ḳhudā hāfiz ki aa pahuñchā hai 'ishq-e-kufr-zā

bhaag jaa.e dil baġhal meñ daab kar islām-e-rūh

thī muyassar 'arsh yā ab hai asīr-e-musht-e-kHāk

vaah kyā āġhāz thā aur kyā huā anjām-e-rūh

jaan kī kis ko ḳhabar dil hī nahīñ hai ai 'vazīr'

ho gayā gum vo nagīñ jis par khudā thā nām-e-rūh

jism se nikli to pahunchi ka’ba-e-maqsud tak

be-libasi ban gai hai jama-e-ehram-e-ruh

do hi din mein naujawani rang-e-piri laegi

ai jahan-e-jism ek din subh hogi sham-e-ruh

soz-e-gham se aab-o-KHak-o-baad hain aatish-mizaj

chaar unsur ka bana chaumukh charagh-e-KHam-e-ruh

koi to jaan-e-jahan mehman sara-e-dil mein hai

dam-ba-dam pahunchate hain paik-e-nafas paigham-e-ruh

KHub-ruon ko zarar pahuncha sake kya inqilab

hur ho jae jo likkhe koi ulTa nam-e-ruh

lo KHuda hafiz ki aa pahuncha hai 'ishq-e-kufr-za

bhag jae dil baghal mein dab kar islam-e-ruh

thi muyassar 'arsh ya ab hai asir-e-musht-e-kHak

wah kya aaghaz tha aur kya hua anjam-e-ruh

jaan ki kis ko KHabar dil hi nahin hai ai 'wazir'

ho gaya gum wo nagin jis par khuda tha nam-e-ruh