yaad-e-chashm-e-surmagin mein shab ko gar aati hai nind

yād-e-chashm-e-surmagīñ meñ shab ko gar aatī hai niiñd

sūrat-e-murġh-e-nihāñ āñkhoñ se laḌ jaatī hai niiñd

niiñd ko bhī niiñd aa jaatī hai hijr-e-yār meñ

chhoḌ kar be-ḳhvāb mujh ko aap so jaatī hai niiñd

furqat-e-dil-dār meñ jo rāt-bhar aa.ī na thī

vasl meñ aate hue āñkhoñ meñ sharmātī hai niiñd

teġh kā phal khāyā āb-e-teġh pī kar so rahe

kasrat-e-āb-o-ġhizā se vāqa.'ī aatī hai niiñd

sote ho to chashm-e-bad-dūr āñkheñ rahtī haiñ khulī

fitna-e-bedār kyā aisī hī kahlātī hai niiñd

hijr meñ sone kī aisī hai tamannā ai 'vazīr'

dekhtā huuñ us ko hasrat se jise aatī hai niiñd

yaad-e-chashm-e-surmagin mein shab ko gar aati hai nind

surat-e-murgh-e-nihan aankhon se laD jati hai nind

nind ko bhi nind aa jati hai hijr-e-yar mein

chhoD kar be-KHwab mujh ko aap so jati hai nind

furqat-e-dil-dar mein jo raat-bhar aai na thi

wasl mein aate hue aankhon mein sharmati hai nind

tegh ka phal khaya aab-e-tegh pi kar so rahe

kasrat-e-ab-o-ghiza se waqa'i aati hai nind

sote ho to chashm-e-bad-dur aankhen rahti hain khuli

fitna-e-bedar kya aisi hi kahlati hai nind

hijr mein sone ki aisi hai tamanna ai 'wazir'

dekhta hun us ko hasrat se jise aati hai nind