یاد چشم سرمگیں میں شب کو گر آتی ہے نیند

یاد چشم سرمگیں میں شب کو گر آتی ہے نیند

صورت مرغ نہاں آنکھوں سے لڑ جاتی ہے نیند

نیند کو بھی نیند آ جاتی ہے ہجر یار میں

چھوڑ کر بے خواب مجھ کو آپ سو جاتی ہے نیند

فرقت دل دار میں جو رات بھر آئی نہ تھی

وصل میں آتے ہوئے آنکھوں میں شرماتی ہے نیند

تیغ کا پھل کھایا آب تیغ پی کر سو رہے

کثرت آب و غذا سے واقعی آتی ہے نیند

سوتے ہو تو چشم بد دور آنکھیں رہتی ہیں کھلی

فتنۂ بیدار کیا ایسی ہی کہلاتی ہے نیند

ہجر میں سونے کی ایسی ہے تمنا اے وزیرؔ

دیکھتا ہوں اس کو حسرت سے جسے آتی ہے نیند