nalan firaq dil mein hai matam-sara-e-dil

nālāñ firāq dil meñ hai mātam-sarā-e-dil

siine se aa rahī hai sadā haaye haaye dil

hāzir hai lījiye ye agar kaam aa.e dil

kuchh aur paas ham nahīñ rakhte sivā-e-dil

aatī hai un ke kūcha-e-gesū se ye sadā

aao musāfiro ki yahāñ hai sarā-e-dil

bū ho ke gul meñ kyā dil-e-bulbul samā gayā

toḌā kisī ne phuul to aa.ī sadā-e-dil

āñkheñ lahū bahā.eñ jo sāġhar se mai gire

shīsha jo gir paḌe to mirā TuuT jaa.e dil

rāhat ga.ī agar to kyā rañj ne guzar

ḳhālī rahe 'vazīr' na mehmāñ-sarā-e-dil

nalan firaq dil mein hai matam-sara-e-dil

sine se aa rahi hai sada haye haye dil

hazir hai lijiye ye agar kaam aae dil

kuchh aur pas hum nahin rakhte siwa-e-dil

aati hai un ke kucha-e-gesu se ye sada

aao musafiro ki yahan hai sara-e-dil

bu ho ke gul mein kya dil-e-bulbul sama gaya

toDa kisi ne phul to aai sada-e-dil

aankhen lahu bahaen jo saghar se mai gire

shisha jo gir paDe to mera TuT jae dil

rahat gai agar to kya ranj ne guzar

KHali rahe 'wazir' na mehman-sara-e-dil