aaj be-dildar ye dil be-KHabar hone laga

aaj be-dildār ye dil be-ḳhabar hone lagā

dard-e-furqat se merā TukḌe jigar hone lagā

vasl kī shab ho chukī ruḳhsat qamar hone lagā

āftāb-e-roz-e-mahshar jalva-gar hone lagā

māh-rū be-mehr ho kar jab kahīñ pinhāñ huā

paḌ gayā andher ghar meñ aur zarar hone lagā

misl-e-gul bāhar gayā gulshan se jab vo gul-ezār

ashk-e-ḳhūnī se merā tan tar-ba-tar hone lagā

misl-e-majnūñ maiñ fidā us rashk-e-lailā par huā

tab ḳharāb aur ḳhasta dekho dar-ba-dar hone lagā

kar diyā barbād saarā ishq ne jab ḳhānumāñ

shahar meñ charchā merā phir ghar-ba-ghar hone lagā

pī sharāb-e-shauq maiñ jab us sanam ke ghar gayā

māl-o-jāñ qurbāñ kiyā sab be-ḳhatar hone lagā

us parī-paikar kā jab ġhairoñ se kuchh dil mil gayā

ham se makr-o-jādū-o-sahar-o-hunar hone lagā

kyā lagāyā yaar ne siine meñ hī tīr-e-nigāh

qaus kī mānind merā kaj kamar hone lagā

ashk hai āñkhoñ se jaarī vo nazar aatā nahīñ

ātish-e-furqat kā dil ko ab asar hone lagā

chhoḌ kar mujh ko gayā hai jab se gul-andām vo

gulshan-e-jag aañkh meñ jiyūñ neshtar hone lagā

kūcha-e-jānāñ meñ jā maiñ jaan dene ko khaḌā

jāñ-rubā chamkā ke ḳhanjar bā-ḳhabar hone lagā

sāmne rauzan ke jā kar dekhtā huuñ jab use

shukr kartā huuñ ki maah zer-e-nazar hone lagā

ab vahāñ aasan jamā kar baiThte haiñ roz-o-shab

jis jagah us māh-paikar kā guzar hone lagā

jab dikhāyā yaar ne dīdār apnā be-hijāb

aql kāñpī ishq aa kar parda-dar hone lagā

jo gayā paas us parī ke phir ke vo aayā nahīñ

go koī dīvāna ban kar be-qadar hone lagā

maiñ ne minnat se kahā ki baat o shīrīñ-dahan

gāliyāñ de kar vo mujh se talḳh-tar hone lagā

dilrubā ko dekhte hī uḌ ga.e hosh-o-havās

dil merā mānind-e-gū zer-o-zabar hone lagā

ālam-e-lāhūt meñ hargiz na thā kuchh dūsrā

us se nīche aa ke shahr-o-bahr-o-bar hone lagā

chashm-e-vahdat se jo dekhā hai usī kā ruup sab

aab bahr-o-zāla-o-barf-o-guhar hone lagā

'ārifā' qātil jab aayā teġh-e-vahdat haath le

qatl ko gardan jhukā maiñ peshtar hone lagā

aaj be-dildar ye dil be-KHabar hone laga

dard-e-furqat se mera TukDe jigar hone laga

wasl ki shab ho chuki ruKHsat qamar hone laga

aaftab-e-roz-e-mahshar jalwa-gar hone laga

mah-ru be-mehr ho kar jab kahin pinhan hua

paD gaya andher ghar mein aur zarar hone laga

misl-e-gul bahar gaya gulshan se jab wo gul-ezar

ashk-e-KHuni se mera tan tar-ba-tar hone laga

misl-e-majnun main fida us rashk-e-laila par hua

tab KHarab aur KHasta dekho dar-ba-dar hone laga

kar diya barbaad sara ishq ne jab KHanuman

shahar mein charcha mera phir ghar-ba-ghar hone laga

pi sharab-e-shauq main jab us sanam ke ghar gaya

mal-o-jaan qurban kiya sab be-KHatar hone laga

us pari-paikar ka jab ghairon se kuchh dil mil gaya

hum se makr-o-jadu-o-sahar-o-hunar hone laga

kya lagaya yar ne sine mein hi tir-e-nigah

qaus ki manind mera kaj kamar hone laga

ashk hai aankhon se jari wo nazar aata nahin

aatish-e-furqat ka dil ko ab asar hone laga

chhoD kar mujh ko gaya hai jab se gul-andam wo

gulshan-e-jag aankh mein jiyun neshtar hone laga

kucha-e-jaanan mein ja main jaan dene ko khaDa

jaan-ruba chamka ke KHanjar ba-KHabar hone laga

samne rauzan ke ja kar dekhta hun jab use

shukr karta hun ki mah zer-e-nazar hone laga

ab wahan aasan jama kar baiThte hain roz-o-shab

jis jagah us mah-paikar ka guzar hone laga

jab dikhaya yar ne didar apna be-hijab

aql kanpi ishq aa kar parda-dar hone laga

jo gaya pas us pari ke phir ke wo aaya nahin

go koi diwana ban kar be-qadar hone laga

main ne minnat se kaha ki baat o shirin-dahan

galiyan de kar wo mujh se talKH-tar hone laga

dilruba ko dekhte hi uD gae hosh-o-hawas

dil mera manind-e-gu zer-o-zabar hone laga

aalam-e-lahut mein hargiz na tha kuchh dusra

us se niche aa ke shahr-o-bahr-o-bar hone laga

chashm-e-wahdat se jo dekha hai usi ka rup sab

aab bahr-o-zala-o-barf-o-guhar hone laga

'arifa' qatil jab aaya tegh-e-wahdat hath le

qatl ko gardan jhuka main peshtar hone laga