آج بے دل دار یہ دل بے خبر ہونے لگا

آج بے دل دار یہ دل بے خبر ہونے لگا

درد فرقت سے میرا ٹکڑے جگر ہونے لگا

وصل کی شب ہو چکی رخصت قمر ہونے لگا

آفتاب روز محشر جلوہ گر ہونے لگا

ماہرو بے مہر ہو کر جب کہیں پنہاں ہوا

پڑ گیا اندھیر گھر میں اور ضرر ہونے لگا

مثل گل باہر گیا گلشن سے جب وہ گلعذار

اشک خونی سے میرا تن تر بہ تر ہونے لگا

مثل مجنوں میں فدا اس رشک لیلیٰ پر ہوا

تب خراب اور خستہ دیکھو در بدر ہونے لگا

کر دیا برباد سارا عشق نے جب خانماں

شہر میں چرچا میرا پھر گھر بہ گھر ہونے لگا

پی شراب شوق میں جب اس صنم کے گھر گیا

مال‌ و جاں قرباں کیا سب بے خطر ہونے لگا

اس پری پیکر کا جب غیروں سے کچھ دل مل گیا

ہم سے مکر و جادو و سحر و ہنر ہونے لگا

کیا لگایا یار نے سینے میں ہی تیر نگاہ

قوس کی مانند میرا کج کمر ہونے لگا

اشک ہے آنکھوں سے جاری وہ نظر آتا نہیں

آتش فرقت کا دل کو اب اثر ہونے لگا

چھوڑ کر مجھ کو گیا ہے جب سے گل اندام وہ

گلشن جگ آنکھ میں جیوں نیشتر ہونے لگا

کوچۂ جاناں میں جا میں جان دینے کو کھڑا

جاں ربا چمکا کے خنجر با خبر ہونے لگا

سامنے روزن کے جا کر دیکھتا ہوں جب اسے

شکر کرتا ہوں کہ ماہ زیر نظر ہونے لگا

اب وہاں آسن جما کر بیٹھتے ہیں روز و شب

جس جگہ اس ماہ پیکر کا گزر ہونے لگا

جب دکھایا یار نے دیدار اپنا بے حجاب

عقل کانپی عشق آ کر پردہ در ہونے لگا

جو گیا پاس اس پری کے پھر کے وہ آیا نہیں

گو کوئی دیوانہ بن کر بے قدر ہونے لگا

میں نے منت سے کہا کہ بات او شیریں دہن

گالیاں دے کر وہ مجھ سے تلخ تر ہونے لگا

دل ربا کو دیکھتے ہی اڑ گئے ہوش و حواس

دل میرا مانند گو زیر و زبر ہونے لگا

عالم لاہوت میں ہرگز نہ تھا کچھ دوسرا

اس سے نیچے آ کے شہر و بحر و بر ہونے لگا

چشم وحدت سے جو دیکھا ہے اسی کا روپ سب

آب بحر و ژالہ و برف و گہر ہونے لگا

عارفاؔ قاتل جب آیا تیغ وحدت ہاتھ لے

قتل کو گردن جھکا میں پیشتر ہونے لگا