ai sanam jab se hui hai aashnai aap ki

ai sanam jab se huī hai āshnā.ī aap kī

dekhtā huuñ tab se hī maiñ bevafā.ī aap kī

gar milūñ to tund-ḳhū ho gāliyāñ dete ho tum

duur rahne se satātī hai judā.ī aap kī

bahr-e-ulfat meñ Duboī muft apnī aabrū

dekh kar bhūle the dilbar dilrubā.ī aap kī

jān-o-dil le kar gayā tū dīn-o-duniyā kar ke saaf

qābil-e-tārīf hai sāhab safā.ī aap kī

maiñ fidā huuñ aap par aur aap ho mujh par ḳhafā

ye merī taqsīr hai yā kaj-adā.ī aap kī

jāntā huuñ ḳhuub ham-sar hai koī terā nahīñ

ḳhud hī ye tum kar rahe ho ḳhud-setā.ī aap kī

kaun likh saktā hai tere vasf ai mere husain

zulfiqār-e-ḳhāma detā hai duhā.ī aap kī

kushta-e-marjāñ ko bhūle aur vo rañg-e-zāfrān

dekhe jo dast-e-hinā.ī yā kalā.ī aap kī

'ārifā' sab mulk-o-daulat aap ke mālik ho tum

aap hī phir lūTte ho hai duhā.ī aap kī

ai sanam jab se hui hai aashnai aap ki

dekhta hun tab se hi main bewafai aap ki

gar milun to tund-KHu ho galiyan dete ho tum

dur rahne se satati hai judai aap ki

bahr-e-ulfat mein Duboi muft apni aabru

dekh kar bhule the dilbar dilrubai aap ki

jaan-o-dil le kar gaya tu din-o-duniya kar ke saf

qabil-e-tarif hai sahab safai aap ki

main fida hun aap par aur aap ho mujh par KHafa

ye meri taqsir hai ya kaj-adai aap ki

jaanta hun KHub ham-sar hai koi tera nahin

KHud hi ye tum kar rahe ho KHud-setai aap ki

kaun likh sakta hai tere wasf ai mere husain

zulfiqar-e-KHama deta hai duhai aap ki

kushta-e-marjaan ko bhule aur wo rang-e-zafran

dekhe jo dast-e-hinai ya kalai aap ki

'arifa' sab mulk-o-daulat aap ke malik ho tum

aap hi phir luTte ho hai duhai aap ki