اے صنم جب سے ہوئی ہے آشنائی آپ کی

اے صنم جب سے ہوئی ہے آشنائی آپ کی

دیکھتا ہوں تب سے ہی میں بے وفائی آپ کی

گر ملوں تو تند خو ہو گالیاں دیتے ہو تم

دور رہنے سے ستاتی ہے جدائی آپ کی

بحر الفت میں ڈبوئی مفت اپنی آبرو

دیکھ کر بھولے تھے دلبر دل ربائی آپ کی

جان و دل لے کر گیا تو دین و دنیا کر کے صاف

قابل تعریف ہے صاحب صفائی آپ کی

میں فدا ہوں آپ پر اور آپ ہو مجھ پر خفا

یہ میری تقصیر ہے یا کج ادائی آپ کی

جانتا ہوں خوب ہمسر ہے کوئی تیرا نہیں

خود ہی یہ تم کر رہے ہو خود ستائی آپ کی

کون لکھ سکتا ہے تیرے وصف اے میرے حسین

ذوالفقار خامہ دیتا ہے دہائی آپ کی

کشتۂ مرجاں کو بھولے اور وہ رنگ زعفران

دیکھے جو دست حنائی یا کلائی آپ کی

عارفاؔ سب ملک و دولت آپ کے مالک ہو تم

آپ ہی پھر لوٹتے ہو ہے دہائی آپ کی