hai aashiq ko apne sanam ki qasam

hai āshiq ko apne sanam kī qasam

mujhe tere ḳhāk-e-qadam kī qasam

meñ kāfir huuñ ai but jo tujh se phirūñ

mujhe apne diin aur dharam kī qasam

parastish maiñ kartā huuñ terī sadā

na ḳhā.uñgā dair aur haram kī qasam

na chhup mujh se tū ai but-e-sañg-dil

tujhe is kitāb aur qalam kī qasam

pilā bāda-e-ma.arifat ab mujhe

tujhe sāqiyā jām-e-jam kī qasam

dikhā zulf-e-mushkīñ jo hai mushkbū

tujhe kākul-e-ḳham najam kī qasam

dikhā mujh ko dīdār ai gul-ezār

tujhe apne bāġh-e-iram kī qasam

kabhī la.al-e-lab se bhī kar lab-ba-lab

tujhe is merī chashm-e-nam kī qasam

tere mubtalā ko hai saugand yuuñ

baḳhīloñ ko hai jyuuñ diram kī qasam

maiñ kahtā huuñ 'ārif' duī duur kar

tujhe apne lutf-o-karam kī qasam

hai aashiq ko apne sanam ki qasam

mujhe tere KHak-e-qadam ki qasam

mein kafir hun ai but jo tujh se phirun

mujhe apne din aur dharam ki qasam

parastish main karta hun teri sada

na KHaunga dair aur haram ki qasam

na chhup mujh se tu ai but-e-sang-dil

tujhe is kitab aur qalam ki qasam

pila baada-e-marifat ab mujhe

tujhe saqiya jam-e-jam ki qasam

dikha zulf-e-mushkin jo hai mushkbu

tujhe kakul-e-KHam najam ki qasam

dikha mujh ko didar ai gul-ezar

tujhe apne bagh-e-iram ki qasam

kabhi lal-e-lab se bhi kar lab-ba-lab

tujhe is meri chashm-e-nam ki qasam

tere mubtala ko hai saugand yun

baKHilon ko hai jyun diram ki qasam

main kahta hun 'arif' dui dur kar

tujhe apne lutf-o-karam ki qasam