ہے عاشق کو اپنے صنم کی قسم

ہے عاشق کو اپنے صنم کی قسم

مجھے تیرے خاک قدم کی قسم

میں کافر ہوں اے بت جو تجھ سے پھروں

مجھے اپنے دین اور دھرم کی قسم

پرستش میں کرتا ہوں تیری سدا

نہ کھاؤں گا دیر اور حرم کی قسم

نہ چھپ مجھ سے تو اے بت سنگ دل

تجھے اس کتاب اور قلم کی قسم

پلا بادۂ معرفت اب مجھے

تجھے ساقیا جام جم کی قسم

دکھا زلف مشکیں جو ہے مشکبو

تجھے کاکل خم نجم کی قسم

دکھا مجھ کو دیدار اے گلعذار

تجھے اپنے باغ ارم کی قسم

کبھی لعل لب سے بھی کر لب بہ لب

تجھے اس میری چشم نم کی قسم

تیرے مبتلا کو ہے سوگند یوں

بخیلوں کو ہے جیوں درم کی قسم

میں کہتا ہوں عارفؔ دوئی دور کر

تجھے اپنے لطف و کرم کی قسم