saf ho jis ki zaban shamshir ki hajat nahin

saaf ho jis kī zabāñ shamshīr kī hājat nahīñ

hai nigāh jis kī safā phir tiir kī hājat nahīñ

jab tasavvur bañdh gayā tasvīr kī hājat nahīñ

zulf ke pāband ko zanjīr kī hājat nahīñ

ḳhūb-rū ḳhud aa mile jab phir kisī kā ḳhauf kyā

ye vo jaadū hai jise tasḳhīr kī hājat nahīñ

dil-rubā har dil meñ hai phir kyuuñ dikhātā hai kise

jaan apnī uzv phir taksīr kī hājat nahīñ

yā ruke kūche meñ jaanā pī mohabbat kī sharāb

mast-o-dīvāna ko kuchh tauqīr kī hājat nahīñ

ālim-o-āqil ko jaanā us jagah dushvār hai

kūdnā dariyā meñ jā tadbīr kī hājat nahīñ

nāma-bar ḳhat de ke us ko lafz kuchh mat boliyo

dam-ba-ḳhud rahiyo terī taqrīr kī hājat nahīñ

ka.aba-o-but-ḳhāna-o-girjā barābar haiñ hameñ

is merī taqrīr ko tafsīr kī hājat nahīñ

sajda-gāh-e-āshiqāñ hai dilbaroñ kā saaf dil

ye vo masjid hai jise ta.amīr kī hājat nahīñ

āshiq-e-sādiq ko jab nābūd hai saarā jahāñ

jab ye dil be-dil huā iksīr kī hājat nahīñ

be-gumāñ mil jā.egā jo hai likhā qismat ke beach

sābir-o-shākir ko kuchh jāgīr kī hājat nahīñ

'ārifā' hai haq yahī bas ġhair-e-haq kuchh bhī na jaan

pī mai-e-vahdat yahāñ tāḳhīr kī hājat nahīñ

saf ho jis ki zaban shamshir ki hajat nahin

hai nigah jis ki safa phir tir ki hajat nahin

jab tasawwur bandh gaya taswir ki hajat nahin

zulf ke paband ko zanjir ki hajat nahin

KHub-ru KHud aa mile jab phir kisi ka KHauf kya

ye wo jadu hai jise tasKHir ki hajat nahin

dil-ruba har dil mein hai phir kyun dikhata hai kise

jaan apni uzw phir taksir ki hajat nahin

ya ruke kuche mein jaana pi mohabbat ki sharab

mast-o-diwana ko kuchh tauqir ki hajat nahin

aalim-o-aqil ko jaana us jagah dushwar hai

kudna dariya mein ja tadbir ki hajat nahin

nama-bar KHat de ke us ko lafz kuchh mat boliyo

dam-ba-KHud rahiyo teri taqrir ki hajat nahin

kaba-o-but-KHana-o-girja barabar hain hamein

is meri taqrir ko tafsir ki hajat nahin

sajda-gah-e-ashiqan hai dilbaron ka saf dil

ye wo masjid hai jise tamir ki hajat nahin

aashiq-e-sadiq ko jab nabud hai sara jahan

jab ye dil be-dil hua iksir ki hajat nahin

be-guman mil jaega jo hai likha qismat ke beach

sabir-o-shakir ko kuchh jagir ki hajat nahin

'arifa' hai haq yahi bas ghair-e-haq kuchh bhi na jaan

pi mai-e-wahdat yahan taKHir ki hajat nahin