mil gaya hai dil kisi didar se

mil gayā hai dil kisī dīdār se

ho gayā bezār ab ghar-bār se

jab se sohbat ho ga.ī mai-ḳhvār se

tab se ham phirte haiñ bas sarshār se

bañdh gayā jo zulf kī ik taar se

chhuT gayā vo momin aur kuffār se

dil merā hai misl-e-bulbul na.ara-zan

misl-e-bū gul-rū gayā gulzār se

hai vo qātil qatl-e-āshiq par khaḌā

maar degā ḳhuuñ bharī talvār se

dard-e-dūrī vasl bin jaatā nahīñ

maut behtar jaan is āzār se

kūcha-e-jānāñ meñ jaanā hai muhāl

ḳhauf hai us sañg-dil ḳhuñḳhār se

dam liyā iisā ne jā kar charḳh par

is tarah bhāgā tere bīmār se

daulat-e-ishq-e-ḳhudā hāsil ho gar

kuchh nahīñ achchhā digar is kaar se

hai ta.ajjub 'ārifā' duniyā ke beach

bhāgtā hai dil bhale kirdār se

mil gaya hai dil kisi didar se

ho gaya bezar ab ghar-bar se

jab se sohbat ho gai mai-KHwar se

tab se hum phirte hain bas sarshaar se

bandh gaya jo zulf ki ek tar se

chhuT gaya wo momin aur kuffar se

dil mera hai misl-e-bulbul nara-zan

misl-e-bu gul-ru gaya gulzar se

hai wo qatil qatl-e-ashiq par khaDa

mar dega KHun bhari talwar se

dard-e-duri wasl bin jata nahin

maut behtar jaan is aazar se

kucha-e-jaanan mein jaana hai muhaal

KHauf hai us sang-dil KHunKHar se

dam liya isa ne ja kar charKH par

is tarah bhaga tere bimar se

daulat-e-ishq-e-KHuda hasil ho gar

kuchh nahin achchha digar is kar se

hai tajjub 'arifa' duniya ke beach

bhagta hai dil bhale kirdar se