مل گیا ہے دل کسی دیدار سے

مل گیا ہے دل کسی دیدار سے

ہو گیا بیزار اب گھر بار سے

جب سے صحبت ہو گئی مے خوار سے

تب سے ہم پھرتے ہیں بس سرشار سے

بندھ گیا جو زلف کی اک تار سے

چھٹ گیا وہ مومن اور کفار سے

دل میرا ہے مثل بلبل نعرہ زن

مثل بو گل رو گیا گلزار سے

ہے وہ قاتل قتل عاشق پر کھڑا

مار دے گا خوں بھری تلوار سے

درد دوری وصل بن جاتا نہیں

موت بہتر جان اس آزار سے

کوچۂ جاناں میں جانا ہے محال

خوف ہے اس سنگ دل خونخوار سے

دم لیا عیسیٰ نے جا کر چرخ پر

اس طرح بھاگا تیرے بیمار سے

دولت عشق خدا حاصل ہو گر

کچھ نہیں اچھا دگر اس کار سے

ہے تعجب عارفاؔ دنیا کے بیچ

بھاگتا ہے دل بھلے کردار سے