kisi ko kya bataun kyun miTa di zindagi apni

kisī ko kyā batā.ūñ kyuuñ miTā dī zindagī apnī

baqā ain-e-baqā zauq-e-fanā meñ dekh lī apnī

sunā hai husn phir uTThā hai paiġhām-e-vafā le kar

ilāhī ḳhair hai betāb chashm-e-multajī apnī

jabīn-e-shauq ke sajdoñ pe sajde tā-ba-ke āḳhir

jo tū ho sāmne to bandagī ho bandagī apnī

mirī āñkheñ haiñ ye taare mirā ronā hai ye shabnam

bikhar kar rah ga.ī hai dāstān-e-be-kasī apnī

na mastī hai na hastī hai na kulfat hai na rāhat hai

yahāñ tak to mujhe le aa.ī hai vāraftagī apnī

ba.iid az fahm hai merī hama-rañgī-o-ham-rañgī

jo kuchh maiñ jāntā huuñ bas haqīqat hai vahī apnī

tamannāoñ kī koī zindagiyāñ le kar aayā thā

vo rañgīñ lamhe jab thī zindagī ik zindagī apnī

jo soz-e-ishq se uḌ kar fazāoñ meñ pareshāñ thiiñ

vahī chiñgāriyāñ jab mil ga.iiñ hastī banī apnī

hadīs-e-barq-o-aiman fitrat-e-dāman pe kanda hai

fazāoñ par vo ḳhud phailā rahe haiñ raushnī apnī

jise kahte haiñ maut ik be-ḳhudī kī niiñd hai 'shā.eq'

pareshānī hai jis kā naam vo hai zindagī apnī

kisi ko kya bataun kyun miTa di zindagi apni

baqa ain-e-baqa zauq-e-fana mein dekh li apni

suna hai husn phir uTTha hai paigham-e-wafa le kar

ilahi KHair hai betab chashm-e-multaji apni

jabin-e-shauq ke sajdon pe sajde ta-ba-ke aaKHir

jo tu ho samne to bandagi ho bandagi apni

meri aankhen hain ye tare mera rona hai ye shabnam

bikhar kar rah gai hai dastan-e-be-kasi apni

na masti hai na hasti hai na kulfat hai na rahat hai

yahan tak to mujhe le aai hai waraftagi apni

baid az fahm hai meri hama-rangi-o-ham-rangi

jo kuchh main jaanta hun bas haqiqat hai wahi apni

tamannaon ki koi zindagiyan le kar aaya tha

wo rangin lamhe jab thi zindagi ek zindagi apni

jo soz-e-ishq se uD kar fazaon mein pareshan thin

wahi chingariyan jab mil gain hasti bani apni

hadis-e-barq-o-aiman fitrat-e-daman pe kanda hai

fazaon par wo KHud phaila rahe hain raushni apni

jise kahte hain maut ek be-KHudi ki nind hai 'shaeq'

pareshani hai jis ka nam wo hai zindagi apni