kisi zohra-shamail ka tasawwur hai mere dil mein

kisī zohra-shamā.il kā tasavvur hai mire dil meñ

munajjim yā qamar kā hai guzar ḳhurshīd-e-manzil meñ

qadam-ranja to farmāo koī rahne na pā.egā

nikal jā.eñgī jitnī ārzūeñ haiñ mire dil meñ

piyegī ḳhuub ai qātil ġhazab kā rañg lā.egī

lagā.ī hai jo mehñdī piis us ko ḳhūn-e-bismil meñ

yahī hairat kā aalam hai to nazzāra kahāñ majnūñ

nikal bhī aa.e mahmil se to phir lailā hai mahmil meñ

duī uTh jaaye to jhagḌā kahāñ shaiḳh-o-barhaman kā

but aa.eñ sajde karte shauq se is ka.aba-e-dil meñ

taḌaptā hai dil-e-sayyād bhī us ke taḌapne par

qayāmat kā asar hai iztirāb-e-murġh-e-bismil meñ

ye bīmārī mohabbat kī koī nairañg hai ai dil

jahāñ aayā masīhā dard duunā ho gayā dil meñ

dahān-e-zaḳhm ne kis kis maze se us ko chūsā hai

lab-e-shīrīñ kī lazzat hai zabān-e-teġh-e-qātil meñ

judā hotī nahīñ gardan se qātil zor kartā hai

zabān-e-teġh ne lazzat ye paa.ī ḳhūn-e-bismil meñ

zarā mahmil se haT kar ḳhaak uḌā o be-adab majnūñ

ḳhayāl itnā to karnā chāhiye ki kaun mahmil meñ

lagā kar vaar ochhā phir na dekhā us taraf ham ne

qazā rotī rahī baiThī huī pahlū-e-bismil meñ

na āmāda huā ho koī ġhamza us kī shoḳhī par

ilāhī ḳhair bijlī sī chamaktī hai mire dil meñ

'amīr' us kī tajallī-gāh hai duniyā jo āñkheñ hoñ

vahī gul hai gulistāñ meñ vahī hai sham.a mahfil meñ

kisi zohra-shamail ka tasawwur hai mere dil mein

munajjim ya qamar ka hai guzar KHurshid-e-manzil mein

qadam-ranja to farmao koi rahne na paega

nikal jaengi jitni aarzuen hain mere dil mein

piyegi KHub ai qatil ghazab ka rang laegi

lagai hai jo mehndi pis us ko KHun-e-bismil mein

yahī hairat ka aalam hai to nazzara kahan majnun

nikal bhi aae mahmil se to phir laila hai mahmil mein

dui uTh jaye to jhagDa kahan shaiKH-o-barhaman ka

but aaen sajde karte shauq se is kaba-e-dil mein

taDapta hai dil-e-sayyaad bhi us ke taDapne par

qayamat ka asar hai iztirab-e-murgh-e-bismil mein

ye bimari mohabbat ki koi nairang hai ai dil

jahan aaya masiha dard duna ho gaya dil mein

dahan-e-zaKHm ne kis kis maze se us ko chusa hai

lab-e-shirin ki lazzat hai zaban-e-tegh-e-qatil mein

juda hoti nahin gardan se qatil zor karta hai

zaban-e-tegh ne lazzat ye pai KHun-e-bismil mein

zara mahmil se haT kar KHak uDa o be-adab majnun

KHayal itna to karna chahiye ki kaun mahmil mein

laga kar war ochha phir na dekha us taraf hum ne

qaza roti rahi baiThi hui pahlu-e-bismil mein

na aamada hua ho koi ghamza us ki shoKHi par

ilahi KHair bijli si chamakti hai mere dil mein

'amir' us ki tajalli-gah hai duniya jo aankhen hon

wahi gul hai gulistan mein wahi hai shama mahfil mein