koi munh chum le ga us nahin par

koī muñh chuum le gā us nahīñ par

shikan rah jaa.e gā yūñhī jabīñ par

girī thī aaj to bijlī hamīñ par

ye kahiye jhuk paḌe vo ham-nashīñ par

kaho be-kas kā maqtal kī zamīñ par

na dāman par na un ke āstīñ par

balā.eñ ban ke vo aa.iiñ hamīñ par

duā.eñ jo ga.iiñ arsh-e-barīñ par

ye qismat daaġh jis meñ dard jis meñ

vo dil ho luuT dast-e-nāznīñ par

rulā kar mujh ko poñchhe ashk dushman

rahā dhabbā ye un kī āstīñ par

uḌaa.e phirtī hai un ko javānī

qadam paḌtā nahīñ un kā zamīñ par

are o charḳh dene ke liye daaġh

bahut haiñ chāñd ke TukḌe zamīñ par

nazākat kostī hai mujh ko kyā kyā

tabī.at aa.ī achchhī nāznīñ par

tamannā-e-asar o chashm-e-hasrat

uThā rakh ab nigāh-e-vāpsīñ par

dharī rah jaa.e gī yūñhī shab-e-vasl

nahīñ lab par shikan un kī jabīñ par

ḳhudā jaane dikhā.e gī ye kyā rañg

duā.eñ jam.a haiñ arsh-e-barīñ par

nigāh-e-shauq garm itnī ki bijlī

na aañch aa.e kahīñ us nāznīñ par

mujhe hai ḳhuun kā da.avā mujhe hai

unhīñ par dāvar-e-mahshar unhīñ par

'riyāz' achchhe musalmāñ aap bhī haiñ

ki dil aayā bhī to kāfir hasīñ par

koi munh chum le ga us nahin par

shikan rah jae ga yunhi jabin par

giri thi aaj to bijli hamin par

ye kahiye jhuk paDe wo ham-nashin par

kaho be-kas ka maqtal ki zamin par

na daman par na un ke aastin par

balaen ban ke wo aain hamin par

duaen jo gain arsh-e-barin par

ye qismat dagh jis mein dard jis mein

wo dil ho luT dast-e-naznin par

rula kar mujh ko ponchhe ashk dushman

raha dhabba ye un ki aastin par

uDae phirti hai un ko jawani

qadam paDta nahin un ka zamin par

are o charKH dene ke liye dagh

bahut hain chand ke TukDe zamin par

nazakat kosti hai mujh ko kya kya

tabiat aai achchhi naznin par

tamanna-e-asar o chashm-e-hasrat

uTha rakh ab nigah-e-wapsin par

dhari rah jae gi yunhi shab-e-wasl

nahin lab par shikan un ki jabin par

KHuda jaane dikhae gi ye kya rang

duaen jama hain arsh-e-barin par

nigah-e-shauq garm itni ki bijli

na aanch aae kahin us naznin par

mujhe hai KHun ka dawa mujhe hai

unhin par dawar-e-mahshar unhin par

'riyaz' achchhe musalman aap bhi hain

ki dil aaya bhi to kafir hasin par