kuchh aur hi ab hai meri duniya jo koi pesh-e-nazar nahin hai

kuchh aur hī ab hai merī duniyā jo koī pesh-e-nazar nahīñ hai

vo hāl-e-qalb-o-jigar nahīñ hai vo rañg-e-shām-o-sahar nahīñ hai

balā hai ye zauq 'āshiqī kā banā hai janjāl mere jī kā

zarā ḳhayāl aa gayā kisī kā to niiñd phir rāt-bhar nahīñ hai

talab meñ kar to kamī na tālib ye nūr-e-dil ho na jaaye hājib

ye sub.h-e-kāzib hai sub.h-e-kāzib sahar nahīñ hai sahar nahīñ hai

na hosh apnā na ham-nashīñ kā na jān-e-zār-o-dil-hazīñ kā

ḳhayāl har dam hai ik hasīñ kā bas ab kisī kī ḳhabar nahīñ hai

isī meñ rakh apnī bas nazar tū nigah na dauḌā idhar-udhar tū

ḳhud is se hai laakh be-ḳhabar tū vo tujh se ḳhud be-ḳhabar nahīñ hai

yahāñ kī rāhat hai koī rāhat yahāñ kī zahmat hai koī zahmat

ye ik sarā hai maqām-e-’ibrat ye koī rahne kā ghar nahīñ hai

ye kyā ġhazab hai ye kyā ġhazab hai ki zar kī 'majzūb' se talab hai

vo sāhib-e-soz-o-sāz ab hai vo sāhib-e-sīm-o-zar nahīñ hai

kuchh aur hi ab hai meri duniya jo koi pesh-e-nazar nahin hai

wo haal-e-qalb-o-jigar nahin hai wo rang-e-sham-o-sahar nahin hai

bala hai ye zauq 'ashiqi ka bana hai janjal mere ji ka

zara KHayal aa gaya kisi ka to nind phir raat-bhar nahin hai

talab mein kar to kami na talib ye nur-e-dil ho na jaye hajib

ye subh-e-kazib hai subh-e-kazib sahar nahin hai sahar nahin hai

na hosh apna na ham-nashin ka na jaan-e-zar-o-dil-hazin ka

KHayal har dam hai ek hasin ka bas ab kisi ki KHabar nahin hai

isi mein rakh apni bas nazar tu nigah na dauDa idhar-udhar tu

KHud is se hai lakh be-KHabar tu wo tujh se KHud be-KHabar nahin hai

yahan ki rahat hai koi rahat yahan ki zahmat hai koi zahmat

ye ek sara hai maqam-e-’ibrat ye koi rahne ka ghar nahin hai

ye kya ghazab hai ye kya ghazab hai ki zar ki 'majzub' se talab hai

wo sahib-e-soz-o-saz ab hai wo sahib-e-sim-o-zar nahin hai