کچھ اور ہی اب ہے میری دنیا جو کوئی پیش نظر نہیں ہے

کچھ اور ہی اب ہے میری دنیا جو کوئی پیش نظر نہیں ہے

وہ حال قلب و جگر نہیں ہے وہ رنگ شام و سحر نہیں ہے

بلا ہے یہ ذوق عاشقی کا بنا ہے جنجال میرے جی کا

ذرا خیال آ گیا کسی کا تو نیند پھر رات بھر نہیں ہے

طلب میں کر تو کمی نہ طالب یہ نور دل ہو نہ جائے حاجب

یہ صبح کاذب ہے صبح کاذب سحر نہیں ہے سحر نہیں ہے

نہ ہوش اپنا نہ ہم نشیں کا نہ جان زار و دل حزیں کا

خیال ہر دم ہے اک حسیں کا بس اب کسی کی خبر نہیں ہے

اسی پہ رکھ اپنی بس نظر تو نگہ نہ دوڑا ادھر ادھر تو

خود اس سے ہے لاکھ بے خبر تو وہ تجھ سے خود بے خبر نہیں ہے

یہاں کی راحت ہے کوئی راحت یہاں کی زحمت ہے کوئی زحمت

یہ اک سرا ہے مقام عبرت یہ کوئی رہنے کا گھر نہیں ہے

یہ کیا غضب ہے یہ کیا غضب ہے کہ زر کی مجذوبؔ سے طلب ہے

وہ صاحب سوز و ساز اب ہے وہ صاحب سیم و زر نہیں ہے