kuchh fikr tumhein uqba ki nahin ahqar ye baDi nadani hai

kuchh fikr tumheñ uqbā kī nahīñ 'ahqar' ye baḌī nādānī hai

duniyā kī ḳhushī kyā iizā kyā ye hādis hai vo faanī hai

kaun aaj chaman meñ aayā kyuuñ bād-e-sabā dīvānī hai

sumbul hai pareshāñ-hāl judā nargis ko alag hairānī hai

qaabū meñ dil-e-nākām rahe rāzī-ba-razā insān rahe

hañgām-e-musībat ghabrānā ik tarh kī ye nādānī hai

hai qulzum-e-ishq ik qahr-e-ḳhudā jo is meñ girā vo Duub gayā

allāh-re us kī gahrā.ī sāhil pe gale tak paanī hai

ummīd nahīñ ab kashti-e-dil sāhil pe salāmat jā pahuñche

dariyā-e-alam bhī baaḌh pe hai ashkoñ kī judā tuġhyānī hai

kuchh fikr tumhein uqba ki nahin 'ahqar' ye baDi nadani hai

duniya ki KHushi kya iza kya ye hadis hai wo fani hai

kaun aaj chaman mein aaya kyun baad-e-saba diwani hai

sumbul hai pareshan-haal juda nargis ko alag hairani hai

qabu mein dil-e-nakaam rahe raazi-ba-raza insan rahe

hangam-e-musibat ghabrana ek tarh ki ye nadani hai

hai qulzum-e-ishq ek qahr-e-KHuda jo is mein gira wo Dub gaya

allah-re us ki gahrai sahil pe gale tak pani hai

ummid nahin ab kashti-e-dil sahil pe salamat ja pahunche

dariya-e-alam bhi baDh pe hai ashkon ki juda tughyani hai