کچھ فکر تمہیں عقبیٰ کی نہیں احقرؔ یہ بڑی نادانی ہے

کچھ فکر تمہیں عقبیٰ کی نہیں احقرؔ یہ بڑی نادانی ہے

دنیا کی خوشی کیا ایذا کیا یہ حادث ہے وہ فانی ہے

کون آج چمن میں آیا کیوں باد صبا دیوانی ہے

سنبل ہے پریشاں حال جدا نرگس کو الگ حیرانی ہے

قابو میں دل ناکام رہے راضی بہ رضا انسان رہے

ہنگام مصیبت گھبرانا اک طرح کی یہ نادانی ہے

ہے قلزم عشق اک قہر خدا جو اس میں گرا وہ ڈوب گیا

اللہ رے اس کی گہرائی ساحل پہ گلے تک پانی ہے

امید نہیں اب کشتئ دل ساحل پہ سلامت جا پہنچے

دریائے الم بھی باڑھ پہ ہے اشکوں کی جدا طغیانی ہے