kuchh nahin ye aamad-e-fasl-e-bahaaran kuchh nahin

kuchh nahīñ ye āmad-e-fasl-e-bahārāñ kuchh nahīñ

ye ghaTā.eñ kuchh nahīñ ye abr-e-bārāñ kuchh nahīñ

ye havā.eñ ThanDī ThanDī ye phuvāreñ narm narm

ye fazā-e-mast ye mastī kā unvāñ kuchh nahīñ

ābshāroñ kī tabassum-reziyoñ kī aaḌ meñ

mustaqil mausīqiyat kī rūh-e-larzāñ kuchh nahīñ

vādiyāñ sarshār-e-mastī mai-kada bar-dosh hoñ

zarra zarra ho agar jannat-ba-dāmāñ kuchh nahīñ

ho kalīsā-e-chaman iisā nafas maryam sifat

ye achhūte phuul ye ma.asūm kaliyāñ kuchh nahīñ

laakh jāma-pārsā hoñ ye saman-o-yāsman

ye riyā-e-sādagī meñ rañg-raliyāñ kuchh nahīñ

kuchh nahīñ ye qais sāmānī-e-lailā hai fareb

ḳhvāb-e-majnūñ kā muraqqa.a sumbulistāñ kuchh nahīñ

haañ ye qalb-e-hasan kī dhaḌkan ye ġhunchoñ kī chaTak

rañg-o-bū shauq-o-hayā kā ahd-o-paimāñ kuchh nahīñ

jannatī hūroñ kā barzaḳh ye mahak ye nik.hateñ

ye misālī jism vaale pāk-dāmāñ kuchh nahīñ

hañs rahe hoñge parī-paikar guloñ kī aaḌ meñ

pañkhuḌī kī oT meñ hogā paristāñ kuchh nahīñ

farsh-e-gul par ishva-e-qudsī nazādān-e-chaman

arsh-e-gul par jalva-e-rabb-e-gulistāñ kuchh nahīñ

ye mazāhir ye manāzir hech haiñ tere baġhair

haañ ye jannāt-e-na.īm-o-rūh-o-raihāñ kuchh nahīñ

tū bahār-e-husn hai terī nazar husn-e-bahār

tū nahīñ to ye gulistāñ kā gulistāñ kuchh nahīñ

kuchh nahin ye aamad-e-fasl-e-bahaaran kuchh nahin

ye ghaTaen kuchh nahin ye abr-e-baran kuchh nahin

ye hawaen ThanDi ThanDi ye phuwaren narm narm

ye faza-e-mast ye masti ka unwan kuchh nahin

aabshaaron ki tabassum-reziyon ki aaD mein

mustaqil mausiqiyat ki ruh-e-larzan kuchh nahin

wadiyan sarshaar-e-masti mai-kada bar-dosh hon

zarra zarra ho agar jannat-ba-daman kuchh nahin

ho kalisa-e-chaman isa nafas maryam sifat

ye achhute phul ye masum kaliyan kuchh nahin

lakh jama-parsa hon ye saman-o-yasman

ye riya-e-sadagi mein rang-raliyan kuchh nahin

kuchh nahin ye qais samani-e-laila hai fareb

KHwab-e-majnun ka muraqqa sumbulistan kuchh nahin

han ye qalb-e-hasan ki dhaDkan ye ghunchon ki chaTak

rang-o-bu shauq-o-haya ka ahd-o-paiman kuchh nahin

jannati huron ka barzaKH ye mahak ye nikhaten

ye misali jism wale pak-daman kuchh nahin

hans rahe honge pari-paikar gulon ki aaD mein

pankhuDi ki oT mein hoga paristan kuchh nahin

farsh-e-gul par ishwa-e-qudsi nazadan-e-chaman

arsh-e-gul par jalwa-e-rabb-e-gulistan kuchh nahin

ye mazahir ye manazir hech hain tere baghair

han ye jannat-e-naim-o-ruh-o-raihan kuchh nahin

tu bahaar-e-husn hai teri nazar husn-e-bahaar

tu nahin to ye gulistan ka gulistan kuchh nahin