kucha-e-zulf-e-sanam mein ahl-e-dil jate hain kyun

kūcha-e-zulf-e-sanam meñ ahl-e-dil jaate haiñ kyuuñ

aur jaate haiñ to dil sī chiiz chhoḌ aate haiñ kyuuñ

sham.a ke mānind hai apnā bhī kyā soz-o-gudāz

sūrat-e-parvāna dushman ham se jal jaate haiñ kyuuñ

kuchh tasavvur hai tumhārā yā tumhīñ har shai meñ ho

dekhiye jo chiiz aap us meñ nazar aate haiñ kyuuñ

kūcha-e-chāk-e-garebāñ kūcha-e-jānāñ nahīñ

qatra-hā-e-ashk-e-hasrat sar ke bal aate haiñ kyuuñ

kohkan kohsār meñ sahrā meñ majnūñ hai ḳharāb

chhoḌ kar kūche ko tere Thokareñ khāte haiñ kyuuñ

maġhz-e-sirr-e-ġhaib shāyad post-kanda kah diyā

khaal sarmad kī hamārī tarh khichvāte haiñ kyuuñ

jhuuT kyuuñ kahtā hai ai qāsid ki vo aate nahīñ

vo agar aate nahīñ ham aap meñ aate haiñ kyuuñ

zo.af ke baa.is to ham bistar se uTh sakte nahīñ

ab koī pūchhe ki duniyā se uThe jaate haiñ kyuuñ

bhāgtā hai ham-kinārī se jo vo dariyā-e-husn

ham basān-e-mauj dast-e-shauq phailāte haiñ kyuuñ

un kī hasrat ke sivā hai kaun is meñ dūsrā

dil kī ḳhalvat meñ bhī vo āshiq se sharmāte haiñ kyuuñ

va.ada kī shab bhej dete haiñ tasavvur maañg kā

jab unheñ aanā nahīñ to raah dikhlāte haiñ kyuuñ

tū hī āshiq meñ hai yā kuchh mahviyat hai 'ishq kī

har rag-o-pai meñ tujhe ai jaan ham paate haiñ kyuuñ

mil chuke ab aa ke vo bichhḌe hue hosh-o-havās

qāfile meñ ham jaras kī tarh chillāte haiñ kyuuñ

aarzū ye hai tumhārā āñchal āñkhoñ se lage

kuchh samajhte ho ki ham rote hue aate haiñ kyuuñ

roz-e-bāzār-e-jazā hai aur ḳhālī apne haath

jab samajhnā thā na samjhe aaj pachhtāte haiñ kyuuñ

jā-e-hairat hai tilism-e-ittihād-e-husn-o-ishq

ā.īna jab dekhte haiñ ham tujhe paate haiñ kyuuñ

putliyoñ par chāhiye rakhnā ġham-e-dildār ko

dāġh-hā-e-dil hamāre aañkh dikhlāte haiñ kyuuñ

āshiqān-e-zār par chashm-e-tavajjoh ḳhair hai

aap dāmān-e-nigah kāñToñ meñ uljhāte haiñ kyuuñ

ham ne maanā dām-e-gesū meñ nahīñ 'āsī' asiir

baaġh meñ nazzāra-e-sumbul se ghabrāte haiñ kyuuñ

kucha-e-zulf-e-sanam mein ahl-e-dil jate hain kyun

aur jate hain to dil si chiz chhoD aate hain kyun

shama ke manind hai apna bhi kya soz-o-gudaz

surat-e-parwana dushman hum se jal jate hain kyun

kuchh tasawwur hai tumhaara ya tumhin har shai mein ho

dekhiye jo chiz aap us mein nazar aate hain kyun

kucha-e-chaak-e-gareban kucha-e-jaanan nahin

qatra-ha-e-ashk-e-hasrat sar ke bal aate hain kyun

kohkan kohsar mein sahra mein majnun hai KHarab

chhoD kar kuche ko tere Thokaren khate hain kyun

maghz-e-sirr-e-ghaib shayad post-kanda kah diya

khaal sarmad ki hamari tarh khichwate hain kyun

jhuT kyun kahta hai ai qasid ki wo aate nahin

wo agar aate nahin hum aap mein aate hain kyun

zoaf ke bais to hum bistar se uTh sakte nahin

ab koi puchhe ki duniya se uThe jate hain kyun

bhagta hai ham-kinari se jo wo dariya-e-husn

hum basan-e-mauj dast-e-shauq phailate hain kyun

un ki hasrat ke siwa hai kaun is mein dusra

dil ki KHalwat mein bhi wo aashiq se sharmate hain kyun

wada ki shab bhej dete hain tasawwur mang ka

jab unhen aana nahin to rah dikhlate hain kyun

tu hi aashiq mein hai ya kuchh mahwiyat hai 'ishq ki

har rag-o-pai mein tujhe ai jaan hum pate hain kyun

mil chuke ab aa ke wo bichhDe hue hosh-o-hawas

qafile mein hum jaras ki tarh chillate hain kyun

aarzu ye hai tumhaara aanchal aankhon se lage

kuchh samajhte ho ki hum rote hue aate hain kyun

roz-e-bazar-e-jaza hai aur KHali apne hath

jab samajhna tha na samjhe aaj pachhtate hain kyun

ja-e-hairat hai tilism-e-ittihad-e-husn-o-ishq

aaina jab dekhte hain hum tujhe pate hain kyun

putliyon par chahiye rakhna gham-e-dildar ko

dagh-ha-e-dil hamare aankh dikhlate hain kyun

aashiqan-e-zar par chashm-e-tawajjoh KHair hai

aap daman-e-nigah kanTon mein uljhate hain kyun

hum ne mana dam-e-gesu mein nahin 'asi' asir

bagh mein nazzara-e-sumbul se ghabraate hain kyun