kya hua gar chashm-e-tar se KHun Tapak kar rah gaya

kyā huā gar chashm-e-tar se ḳhuuñ Tapak kar rah gayā

bāda-e-gulgūñ kā sāġhar thā chhalak kar rah gayā

dil svād-e-zulf meñ DhūñDe hai rastā maañg kā

raah jo bhūlā musāfir so bhaTak kar rah gayā

saiñkaḌoñ mar mar ga.e haiñ ishq ke hāthoñ se aah

maiñ hī kyā patthar se apnā sar paTak kar rah gayā

ham-rahāñ pahuñche kabhī ke manzil-e-maqsūd ko

do qadam chalte hī maiñ haihāt thak kar rah gayā

taab us baalī ke motī kī nahīñ kyā zulf meñ

ai dil-e-āshufta sach kah kyuuñ tū bik kar rah gayā

sar-zamīn-e-shām meñ taarā girā thā TuuT kar

yā añdherī raat meñ jugnūñ chamak kar rah gayā

turfat-ul-ain us kī mizhgāñ kī tasavvur se 'nasīr'

ḳhaar sā āñkhoñ meñ merī kuchh khaTak kar rah gayā

kya hua gar chashm-e-tar se KHun Tapak kar rah gaya

baada-e-gulgun ka saghar tha chhalak kar rah gaya

dil swad-e-zulf mein DhunDe hai rasta mang ka

rah jo bhula musafir so bhaTak kar rah gaya

sainkaDon mar mar gae hain ishq ke hathon se aah

main hi kya patthar se apna sar paTak kar rah gaya

ham-rahan pahunche kabhī ke manzil-e-maqsud ko

do qadam chalte hi main haihat thak kar rah gaya

tab us baali ke moti ki nahin kya zulf mein

ai dil-e-ashufta sach kah kyun tu bik kar rah gaya

sar-zamin-e-sham mein tara gira tha TuT kar

ya andheri raat mein jugnun chamak kar rah gaya

turfat-ul-ain us ki mizhgan ki tasawwur se 'nasir'

KHar sa aankhon mein meri kuchh khaTak kar rah gaya