kya nazar aata tujhe aalam teri tanwir ka

kyā nazar aatā tujhe aalam tirī tanvīr kā

nuur āñkhoñ ko milā thā dīda-e-tasvīr kā

maiñ zabān-e-ḳhāma huuñ ḳhūgar nahīñ taqrīr kā

ham-zabāñ huuñ is chaman meñ bulbul-e-tasvīr kā

mai se chullū bhar de saaqī jaam kā kyā intizār

abr aayā jhuum kar mauqa nahīñ tāḳhīr kā

husn ke nashsha meñ kuchh parvā na tujh ko is kī ho

ḳhāma-e-bahzād muñh chūmā kare tasvīr kā

lāġharī baḳhshī mujhe dīvāngī ne is qadar

ban gayā huuñ mardumak maiñ dīda-e-zanjīr kā

vo sarāpā nuur hai to sāda-kāroñ ne kahā

chāhiye zevar ko sonā mehr-e-pur-tanvīr kā

kushta-e-ḳhāmūshī-e-dildār huuñ maiñ ai nadīm

maiñ ne paa.ī hai zabāñ but kī dahan tasvīr kā

mad.h-e-ḳhatt-e-mus.haf-e-tābāñ vo sun kar bol uThā

martaba qur.ān se baḌh kar nahīñ tafsīr kā

zab.h kartī hai judā.ī mujh ko us kī sub.h-e-vasl

ḳhvāb se chauñk ai mo.azzin vaqt hai takbīr kā

zāhirī zīnat se lutf-e-bātinī mumkin nahīñ

dekh lo be-kār hai par bulbul-e-tasvīr kā

mujh ko ye haT hai ki ab tadbīr se tañg aa gayā

un ko ye zid hai ki maiñ qaa.el nahīñ taqdīr kā

sūrat-e-bismil taḌaptā huuñ ai jān-e-sub.h-e-vasl

kam nahīñ ḳhanjar se mujh ko zamzama takbīr kā

huuñ vo barbād-e-jahāñ naqsha jo mushkil se khiñchā

rañg ban kar uḌ gayā kāġhaz merī tasvīr kā

naḳhl-band-e-gulshan-e-mazmūñ huuñ faiz-e-fikr se

har varaq dīvāñ kā mere baaġh hai kashmīr kā

aarzū thī karbalā meñ dafn hote 'arsh' ham

dekhte mar kar bhī rauza hazrat-e-shabbīr kā

kya nazar aata tujhe aalam teri tanwir ka

nur aankhon ko mila tha dida-e-taswir ka

main zaban-e-KHama hun KHugar nahin taqrir ka

ham-zaban hun is chaman mein bulbul-e-taswir ka

mai se chullu bhar de saqi jam ka kya intizar

abr aaya jhum kar mauqa nahin taKHir ka

husn ke nashsha mein kuchh parwa na tujh ko is ki ho

KHama-e-bahzad munh chuma kare taswir ka

laghari baKHshi mujhe diwangi ne is qadar

ban gaya hun mardumak main dida-e-zanjir ka

wo sarapa nur hai to sada-karon ne kaha

chahiye zewar ko sona mehr-e-pur-tanwir ka

kushta-e-KHamushi-e-dildar hun main ai nadim

main ne pai hai zaban but ki dahan taswir ka

madh-e-KHatt-e-mushaf-e-taban wo sun kar bol uTha

martaba quran se baDh kar nahin tafsir ka

zabh karti hai judai mujh ko us ki subh-e-wasl

KHwab se chaunk ai moazzin waqt hai takbir ka

zahiri zinat se lutf-e-baatini mumkin nahin

dekh lo be-kar hai par bulbul-e-taswir ka

mujh ko ye haT hai ki ab tadbir se tang aa gaya

un ko ye zid hai ki main qael nahin taqdir ka

surat-e-bismil taDapta hun ai jaan-e-subh-e-wasl

kam nahin KHanjar se mujh ko zamzama takbir ka

hun wo barbaad-e-jahan naqsha jo mushkil se khincha

rang ban kar uD gaya kaghaz meri taswir ka

naKHl-band-e-gulshan-e-mazmun hun faiz-e-fikr se

har waraq diwan ka mere bagh hai kashmir ka

aarzu thi karbala mein dafn hote 'arsh' hum

dekhte mar kar bhi rauza hazrat-e-shabbir ka