kya qayamat tha wo jalwa teri ra’nai ka

kyā qayāmat thā vo jalva tirī rā’nā.ī kā

tujh se dekhā na gayā haal tamāshā.ī kā

tazkira farz hī kyā hai tirī ra.anā.ī kā

sach to ye hai ki mujhe shauq hai rusvā.ī kā

hairat-e-jalva se chhāyā hai añdherā har sū

tere jalvoñ meñ hai 'ālam shab-e-tanhā.ī kā

mujh ko ġhairat ki tumheñ dekh rahī hai duniyā

mutma.in tum ki tamāshā hai ye saudā.ī kā

de nigāhoñ ko na taklīf tamāshā-e-jahāñ

raaz hai terī nazar meñ mirī rusvā.ī kā

mutma.in ho ga.e kuchh dekh ke ā.īne meñ tum

tumheñ andāz kahāñ 'ishq kī gahrā.ī kā

dost masrūf-e-parastārī-e-ḳhud hai 'maikash'

mo'tabar aaj nahīñ zo’m shanāsā.ī kā

kya qayamat tha wo jalwa teri ra’nai ka

tujh se dekha na gaya haal tamashai ka

tazkira farz hi kya hai teri ranai ka

sach to ye hai ki mujhe shauq hai ruswai ka

hairat-e-jalwa se chhaya hai andhera har su

tere jalwon mein hai 'alam shab-e-tanhai ka

mujh ko ghairat ki tumhein dekh rahi hai duniya

mutmain tum ki tamasha hai ye saudai ka

de nigahon ko na taklif tamasha-e-jahan

raaz hai teri nazar mein meri ruswai ka

mutmain ho gae kuchh dekh ke aaine mein tum

tumhein andaz kahan 'ishq ki gahrai ka

dost masruf-e-parastari-e-KHud hai 'maikash'

mo'tabar aaj nahin zo’m shanasai ka