kyun jawani aai do din ke liye

kyuuñ javānī aa.ī do din ke liye

din gine jaate the is san ke liye

hirs-e-mai mujh ko nahīñ ai mai-e-farosh

ek ḳham kaafī hai do din ke liye

ye bhale sab se hamāre vāste

ham bure kin ke liye un ke liye

chheḌ merī dekhnā vaqt-e-azāñ

kaan chupke se muazzin ke liye

tū batā de tere hoñToñ ke nisār

bū se kyuuñ kar tere gin gin ke liye

hai farishtoñ kī barābar umr-e-hūr

kyā tamannā aisī kamsin ke liye

dīda-o-dil phuuT kar rote haiñ kyuuñ

jhīñkte the ham usī din ke liye

ham ne apne āshiyāñ ke vāste

jo chubhe dil meñ vahī tinke liye

tum javānī ke maze luuTo 'riyāz'

aib bhī zebā hai is sin ke liye

kyun jawani aai do din ke liye

din gine jate the is san ke liye

hirs-e-mai mujh ko nahin ai mai-e-farosh

ek KHam kafi hai do din ke liye

ye bhale sab se hamare waste

hum bure kin ke liye un ke liye

chheD meri dekhna waqt-e-azan

kan chupke se muazzin ke liye

tu bata de tere honTon ke nisar

bu se kyun kar tere gin gin ke liye

hai farishton ki barabar umr-e-hur

kya tamanna aisi kamsin ke liye

dida-o-dil phuT kar rote hain kyun

jhinkte the hum usi din ke liye

hum ne apne aashiyan ke waste

jo chubhe dil mein wahi tinke liye

tum jawani ke maze luTo 'riyaz'

aib bhi zeba hai is sin ke liye