likh ke lata hai abas shaiKH machhandar ta’wiz

likh ke laatā hai 'abas shaiḳh machhandar tā’vīz

dāġh-e-mahbūb se hai ab koī behtar tā’vīz

nau-ratan kā kareñ kis taur vo ḳhush bāzū-band

hai divānoñ ko tire kūche kā patthar tā’vīz

rasm-o-tadbīr ġhalat jaan to taqdīr pe chhoḌ

shaiḳh kis vāste karatā hai ye mantar tā’vīz

ḳhat-e-bātil kī tarh mahv ho taksīr kā 'ilm

dekh ḳhat nav-ḳhatoñ kā hove na shashdar tā’vīz

haikal-e-dāġh gulū-gīr huī hai mere

'ishq' ke dil ne kiyā jab se ye aḳhgar tā’vīz

likh ke lata hai 'abas shaiKH machhandar ta’wiz

dagh-e-mahbub se hai ab koi behtar ta’wiz

nau-ratan ka karen kis taur wo KHush bazu-band

hai diwanon ko tere kuche ka patthar ta’wiz

rasm-o-tadbir ghalat jaan to taqdir pe chhoD

shaiKH kis waste karata hai ye mantar ta’wiz

KHat-e-baatil ki tarh mahw ho taksir ka 'ilm

dekh KHat naw-KHaton ka howe na shashdar ta’wiz

haikal-e-dagh gulu-gir hui hai mere

'ishq' ke dil ne kiya jab se ye aKHgar ta’wiz