maghrur na itna ho dilbar tu aur nahin main aur nahin

maġhrūr na itnā ho dilbar tū aur nahīñ maiñ aur nahīñ

be-vaj.h na mujh se pher nazar tū aur nahīñ maiñ aur nahīñ

ye husn javānī ye shoḳhī hai chār-dinoñ kī rañgīnī

tū naaz na kar in bātoñ par tū aur nahīñ maiñ aur nahīñ

tū ek hasīñ hai lākhoñ meñ ye maan liyā maiñ ne lekin

maiñ bhī huuñ bashar tū bhī hai bashar tū aur nahīñ maiñ aur nahīñ

tū chāhe na kar dil se ulfat tū chāhe na rakh mujh se nisbat

maiñ terī nazar meñ ġhair magar tū aur nahīñ maiñ aur nahīñ

kyā ka.aba kyā masjid mandir us harjā.ī ke haiñ sab ghar

ik nuur hai sab meñ jalva-gar tū aur nahīñ maiñ aur nahīñ

aiboñ se mire kyuuñ kar hai zid kyā un se tujhe matlab zāhid

tū dekh na mere aib-o-hunar tū aur nahīñ maiñ aur nahīñ

apnoñ se nafrat Thiik nahīñ 'purnam' kā kahnā maan bhī jā

ab aa ke gale mil der na kar tū aur nahīñ maiñ aur nahīñ

maghrur na itna ho dilbar tu aur nahin main aur nahin

be-wajh na mujh se pher nazar tu aur nahin main aur nahin

ye husn jawani ye shoKHi hai chaar-dinon ki rangini

tu naz na kar in baaton par tu aur nahin main aur nahin

tu ek hasin hai lakhon mein ye man liya main ne lekin

main bhi hun bashar tu bhi hai bashar tu aur nahin main aur nahin

tu chahe na kar dil se ulfat tu chahe na rakh mujh se nisbat

main teri nazar mein ghair magar tu aur nahin main aur nahin

kya kaba kya masjid mandir us harjai ke hain sab ghar

ek nur hai sab mein jalwa-gar tu aur nahin main aur nahin

aibon se mere kyun kar hai zid kya un se tujhe matlab zahid

tu dekh na mere aib-o-hunar tu aur nahin main aur nahin

apnon se nafrat Thik nahin 'purnam' ka kahna man bhi ja

ab aa ke gale mil der na kar tu aur nahin main aur nahin