hamara sar hai faqat uske aastan ke liye

hamārā sar hai faqat us ke āstāñ ke liye

na kibr-o-nikHvat-o-pindār-o-izz-o-shāñ ke liye

majāz meñ haiñ paḌe chhoḌ kar haqīqat ko

kahāñ pahuñch ga.e nikle the ham kahāñ ke liye

kabhī to kushta-e-ulfat kī dil-dahī kar do

ye muntazir hai faqat ek lafz-e-hāñ ke liye

sahar ke naale mere be-sabab nahīñ nāseh

jaras kī tarah maiñ huuñ ḳhufta kārvāñ ke liye

ye gosh-e-gul meñ sadā 'andalīb kī pahuñchī

girī jo barq to mere hī āshiyāñ ke liye

natīja ḳhez huā chaak dāman-e-yūsuf

zuleḳhā daaġh banī apne ḳhānumāñ ke liye

hamāre rañj-o-mehan kī hai dāstān tavīl

kuchh is jahāñ ke liye hai kuchh us jahāñ ke liye

hamara sar hai faqat us ke aastan ke liye

na kibr-o-nikHwat-o-pindar-o-izz-o-shan ke liye

majaz mein hain paDe chhoD kar haqiqat ko

kahan pahunch gae nikle the hum kahan ke liye

kabhi to kushta-e-ulfat ki dil-dahi kar do

ye muntazir hai faqat ek lafz-e-han ke liye

sahar ke nale mere be-sabab nahin naseh

jaras ki tarah main hun KHufta karwan ke liye

ye gosh-e-gul mein sada 'andalib ki pahunchi

giri jo barq to mere hi aashiyan ke liye

natija KHez hua chaak daman-e-yusuf

zuleKHa dagh bani apne KHanuman ke liye

hamare ranj-o-mehan ki hai dastan tawil

kuchh is jahan ke liye hai kuchh us jahan ke liye