kahan tak Thokaren khaya karegi iltija meri

kahāñ tak Thokareñ khāyā karegī iltijā merī

vo but suntā nahīñ hai tuuhī sun le ai ḳhudā merī

fuġhāñ be-fā.ida be-sūd naale be-asar aaheñ

mirā muñh dekhtī hai be-kasī meñ iltijā merī

kuchh aisā lutf-e-nākāmī ne mustaġhnā banāyā hai

asar ko dekh kar muñh pher latī hai duā merī

kahīñ husn-o-mohabbat kī fasāne miTne vaale haiñ

rahegī yaad duniyā ko jafā terī vafā merī

rah-e-ulfat meñ miT-miT kar ġham-e-furqat meñ mar-mar kar

kisī din hohī jā.egī fanā merī baqā merī

nadāmat se meñ jab gardan jhukā lūñgā sar-e-mahshar

yaqīñ hai baḳhsh degā baḳhshne vaalā ḳhatā merī

guzartī hai jo ai 'mahfūz' mujh par maiñ hī vāqif huuñ

kisī ko kyā ḳhabar hai āj-kal hālat hai kyā merī

kahan tak Thokaren khaya karegi iltija meri

wo but sunta nahin hai tuhi sun le ai KHuda meri

fughan be-faida be-sud nale be-asar aahen

mera munh dekhti hai be-kasi mein iltija meri

kuchh aisa lutf-e-nakaami ne mustaghna banaya hai

asar ko dekh kar munh pher lati hai dua meri

kahin husn-o-mohabbat ki fasane miTne wale hain

rahegi yaad duniya ko jafa teri wafa meri

rah-e-ulfat mein miT-miT kar gham-e-furqat mein mar-mar kar

kisi din hohi jaegi fana meri baqa meri

nadamat se mein jab gardan jhuka lunga sar-e-mahshar

yaqin hai baKHsh dega baKHshne wala KHata meri

guzarti hai jo ai 'mahfuz' mujh par main hi waqif hun

kisi ko kya KHabar hai aaj-kal haalat hai kya meri