main hi madhosh tahayyur hun mujhe hosh nahin

maiñ hī mad.hosh tahayyur huuñ mujhe hosh nahīñ

kaun kahtā hai vo rū-posh hai rū-posh nahīñ

qissa-e-roz-e-azal yaad hai ab tak mujh ko

ḳhud-farāmosh to huuñ ahd-e-farāmosh nahīñ

va.ada-e-vasl ne Dhāyā hai nayā aur sitam

aaj dard ġham-e-furqat bhī ham-āġhosh nahīñ

ham bhī to dekhne vaale haiñ nigāheñ terī

sāqī-e-mast nazar ḳhud bhī tujhe hosh nahīñ

shauq-e-dīdār hai kyā naam usī kā muusā

jab tamannā huī puurī to tumheñ hosh nahīñ

va.ada-e-vasl rahā hashr pe un kā mauqūf

bār-e-furqat se maiñ mar kar bhī sabk-dos nahīñ

vo nahīñ haiñ to tasavvur to hai un kā 'mahfūz'

shab-e-furqat meñ bhī ḳhālī mirā āġhosh nahīñ

main hi madhosh tahayyur hun mujhe hosh nahin

kaun kahta hai wo ru-posh hai ru-posh nahin

qissa-e-roz-e-azal yaad hai ab tak mujh ko

KHud-faramosh to hun ahd-e-faramosh nahin

wada-e-wasl ne Dhaya hai naya aur sitam

aaj dard gham-e-furqat bhi ham-aghosh nahin

hum bhi to dekhne wale hain nigahen teri

saqi-e-mast nazar KHud bhi tujhe hosh nahin

shauq-e-didar hai kya nam usi ka musa

jab tamanna hui puri to tumhein hosh nahin

wada-e-wasl raha hashr pe un ka mauquf

bar-e-furqat se main mar kar bhi sabk-dos nahin

wo nahin hain to tasawwur to hai un ka 'mahfuz'

shab-e-furqat mein bhi KHali mera aaghosh nahin