main sada se aashiq-e-zar tha kabhi nur ka kabhi nar ka

maiñ sadā se 'āshiq-e-zār thā kabhī nuur kā kabhī naar kā

vahī silsila hai abhī talak vahī aas bos-o-kanār kā

maiñ ḳhizāñ-zada to azal se huuñ mire bāl-o-par bhī jhulas ga.e

na to jism-o-jāñ meñ sakat rahī na to valvala hai bahār kā

kabhī niiñd khultī hai raat meñ kabhī bhor meñ ye sadā milī

uTho jaao jānib-e-lāla ruḳh vo abhī bhī pyāsā hai pyaar kā

kabhī vajd meñ jo maiñ aa gayā sar-e-bazm saaqī ne ye kahā

raho had meñ tum raho bā-adab ye asar hai tum meñ ḳhumār kā

ye dhuāñ-dhuāñ hai jo chār-sū zarā ġhaur se ise dekh tū

ye bhī 'aks āh-o-bukā kā hai ye asar hai dil ke ġhubār kā

mirī zindagī bhī basar huī usī gulistāñ ke hisār meñ

mirā rishta is se qarīb hai vahī rishta hai gul-o-ḳhār kā

na sitam karo na sahn karo usī tarh mashq-e-suḳhan karo

kaho saare apne harīfoñ se nahīñ Dar hai qaid-o-hisār kā

ye nizām-o-shams-o-qamar hai kyā mire rab kī saarī karāmateñ

pas-e-parda rabb-e-jalīl hai vahī rab hai lail-o-nahār kā

kabhī sāz-e-dil ko to chheḌiye kabhī naġhmagī ko suneñ zarā

to suneñge naġhma-e-jāñ-ba-lab ba-lab dil shikasta sitār kā

ye maqām hai vo maqām-e-shab sabhī mast pī kar mai-e-alast

na ḳhabar hai gird-o-navāh kī nahīñ hosh dil kī pukār kā

mirī zindagī meñ thī sādgī koī sho.aba koī paḌāv ho

haañ abhī hai vahī valvala vahī jazba ab bhī nisār kā

maiñ palā jahāñ maiñ baḌhā jahāñ jahāñ merī nashv-o-numā huī

sabhī yaad aate haiñ barmalā hai qarz qurb-o-javār kā

maiñ yahāñ rahūñ yā vahāñ rahūñ mirī soch ab bhī vahīñ kī hai

maiñ karūñ bhī kyā ki utaar duuñ hai ye bojh sar pe udhār kā

kabhī ġham meñ ġham ke asar meñ bhī kabhī yaad apnoñ kī aa ga.ī

kabhī chilchilātī sī dhuup meñ jaise ek jhoñkā phuvār kā

main sada se 'ashiq-e-zar tha kabhi nur ka kabhi nar ka

wahi silsila hai abhi talak wahi aas bos-o-kanar ka

main KHizan-zada to azal se hun mere baal-o-par bhi jhulas gae

na to jism-o-jaan mein sakat rahi na to walwala hai bahaar ka

kabhi nind khulti hai raat mein kabhi bhor mein ye sada mili

uTho jao jaanib-e-lala ruKH wo abhi bhi pyasa hai pyar ka

kabhi wajd mein jo main aa gaya sar-e-bazm saqi ne ye kaha

raho had mein tum raho ba-adab ye asar hai tum mein KHumar ka

ye dhuan-dhuan hai jo chaar-su zara ghaur se ise dekh tu

ye bhi 'aks aah-o-buka ka hai ye asar hai dil ke ghubar ka

meri zindagi bhi basar hui usi gulistan ke hisar mein

mera rishta is se qarib hai wahi rishta hai gul-o-KHar ka

na sitam karo na sahn karo usi tarh mashq-e-suKHan karo

kaho sare apne harifon se nahin Dar hai qaid-o-hisar ka

ye nizam-o-shams-o-qamar hai kya mere rab ki sari karamaten

pas-e-parda rabb-e-jalil hai wahi rab hai lail-o-nahaar ka

kabhi saz-e-dil ko to chheDiye kabhi naghmagi ko sunen zara

to sunenge naghma-e-jaan-ba-lab ba-lab dil shikasta sitar ka

ye maqam hai wo maqam-e-shab sabhi mast pi kar mai-e-alast

na KHabar hai gird-o-nawah ki nahin hosh dil ki pukar ka

meri zindagi mein thi sadgi koi shoaba koi paDaw ho

han abhi hai wahi walwala wahi jazba ab bhi nisar ka

main pala jahan main baDha jahan jahan meri nashw-o-numa hui

sabhi yaad aate hain barmala hai qarz qurb-o-jawar ka

main yahan rahun ya wahan rahun meri soch ab bhi wahin ki hai

main karun bhi kya ki utar dun hai ye bojh sar pe udhaar ka

kabhi gham mein gham ke asar mein bhi kabhi yaad apnon ki aa gai

kabhi chilchilati si dhup mein jaise ek jhonka phuwar ka