محبت بکتی ہو گر شہر میں ایسی دکاں ڈھونڈیں

محبت بکتی ہو گر شہر میں ایسی دکاں ڈھونڈیں

کدورت دل کی دھلتی ہو جہاں ایسی دکاں ڈھونڈیں

سکونِ دل میسر ہو کوئی ایسا مکاں ڈھونڈیں

مناسب اب نہیں ہر چیز میں سود و زیاں ڈھونڈیں

بگڑتی بات بھی بن جاتی ہے شیریں زبانی سے

اگر بکتی ہو تیرے شہر میں ایسی زباں ڈھونڈیں

شبِ دیجور کی چوری ہو یا ہو روزِ روشن کی

پتہ تو مل ہی جائے گا چلو کوئی نشاں ڈھونڈیں

بہت مشکل ہے لفظوں میں پرونا دل کی حالت کو

بتائے ہی بنا جو بات کہہ دے وہ بیاں ڈھونڈیں

بہت گھبرا گئے ہیں زندگی کے شور سے عالمؔ

جہاں بجتی ہو بنسی چین کی ایسا جہاں ڈھونڈیں