عشق خلوت میں تھا آخر سر بازار ہوا

عشق خلوت میں تھا آخر سر بازار ہوا

ایک عالم میری حالت سے خبر دار ہوا

لیلیٰ مجنوں کا ہے قصہ یا زلیخا یوسف

عشق میں شیریں کے فرہاد کیوں کوہسار ہوا

عشق اور مشک چھپانے سے کہیں چھپتا ہے

لاکھ حجرے میں رکھو طبلۂ عطار ہوا

رخ دکھا اپنا ذرا اور اٹھا دے مقتع

جامۂ زندگی بس تن پہ گر انبار ہوا

ایک لحظہ نہ جدا یار وفا دار سے ہو

وقت سختی و مصیبت جو مدد گار ہوا

یار دنیا سے وفائی نہیں دیکھا کوئی

امتحان کر کے زمانہ کا میں ہوشیار ہوا

کس میں طاقت ہے کرے وصف امام اعظم

سو دفعہ خواب میں رب کا جسے دیدار ہوا

برس چالیس تک ایک وضو سے نماز عشا

کیا نماز فجر پڑھی کیسا یہ سردار ہوا

کیا نکلتی ہے زباں سے وہ انا الحق کی صدا

سرِ منصوراسی واسطے بردار ہوا

رند مستوں کا ہے مقبول سبھی حال وقال

مئے وحدت جو پیا اس کا رب غفار ہوا

جامۂ چوں کی خبر جس کو نہ ہو ہے مجذوب

حالتِ جذب میں کیا حال نمودار ہوا

عاشقِ نام محمد کو نہ چھوئے گی دوزخ

نفس شیطاں سے گر لاکھ گنہ گار ہوا

ہوئی اسی وسیلہ سے اسی نام کے آدم کی نجات

توبہ قبول ہوئی کیا یہ استغفار ہوا

غرق سے نوح کی کشتی کو نکالا کس نے

نور احمد میرا ہر جائے مدد گار ہوا

شر سے نمرود کے بچنے کا سبب تھا ہونا

شعلۂ نار ابراہیم پر گل زار ہوا

گل نہ ہووے گا قیامت تک چراغِ محمودؔ

جس نے افروختہ کی وہی نگہدار ہوا