mahrum-e-tasawwu kar na diya majbur-e-tamasha kar na diya

mahrūm-e-tasavvu kar na diyā majbūr-e-tamāshā kar na diyā

mahfil ko mirī barham kar ke tum ne mujhe tanhā kar na diyā

paiġhām mohabbat ke de kar ham-zauq-e-zulaiḳhā kar na diyā

āḳhir ham ne ai husn tujhe pāband-e-tamannā kar na diyā

insān ke dil meñ ghuT-ghuT kar jo ruuh ko khaa.e jaatā hai

himmat thī agar to duniyā ne us raaz ko ifshā kar na diyā

ab mere dil-e-ḳhūñ-gashta kī har mauj tamanna-parvar hai

māyūs-e-mohabbat kar ke mujhe bezār-e-tamanna kar na diyā

ab tak merā zulmat-ḳhāna hai be-sham.a-o-be-parvana

tāroñ ne charāġhāñ kar na diyā sūraj ne ujālā kar na diyā

maiñ ek nazar se āsūda apnī ḳhalvat meñ baiThā huuñ

ai jalva-e-har-sū-e-fitrat tū ne mujhe rusvā kar na diyā

aivān-e-tasavvur se apne niklā na talab kī duniyā meñ

jab tak har zarre ko maiñ ne phailā kar duniyā kar na diyā

maiñ ne to kahā thā pahle hī Duubā to ubharnā mushkil hai

ai be-ḳhabarī kho kar mujh ko phir tū ne paidā kar na diyā

'sīmāb' jo tark-e-duniyā par ta.ane mujhe aksar dete haiñ

un logoñ ne dāman ko mire vābasta-e-duniyā kar na diyā

mahrum-e-tasawwu kar na diya majbur-e-tamasha kar na diya

mahfil ko meri barham kar ke tum ne mujhe tanha kar na diya

paigham mohabbat ke de kar ham-zauq-e-zulaiKHa kar na diya

aaKHir hum ne ai husn tujhe paband-e-tamanna kar na diya

insan ke dil mein ghuT-ghuT kar jo ruh ko khae jata hai

himmat thi agar to duniya ne us raaz ko ifsha kar na diya

ab mere dil-e-KHun-gashta ki har mauj tamanna-parwar hai

mayus-e-mohabbat kar ke mujhe bezar-e-tamanna kar na diya

ab tak mera zulmat-KHana hai be-shama-o-be-parwana

taron ne charaghan kar na diya suraj ne ujala kar na diya

main ek nazar se aasuda apni KHalwat mein baiTha hun

ai jalwa-e-har-su-e-fitrat tu ne mujhe ruswa kar na diya

aiwan-e-tasawwur se apne nikla na talab ki duniya mein

jab tak har zarre ko main ne phaila kar duniya kar na diya

main ne to kaha tha pahle hi Duba to ubharna mushkil hai

ai be-KHabari kho kar mujh ko phir tu ne paida kar na diya

'simab' jo tark-e-duniya par tane mujhe aksar dete hain

un logon ne daman ko mere wabasta-e-duniya kar na diya