mahw ho kar be-niyaz-e-ma-siwa ho jaiye

mahv ho kar be-niyāz-e-mā-sivā ho jā.iye

un se jab mil jā.iye sab se judā ho jā.iye

ḳhalvat-e-ġham kī ḳhamoshī meñ fanā ho jā.iye

yuuñ hayāt-afroz-e-nāmūs-e-vafā ho jā.iye

muntahā-e-manzil-e-jānāñ hai jab vāraftagī

kyuuñ na āvāra misāl-e-naqsh-e-pā ho jā.iye

shart-e-āzādī asīrī jab musallam ho chukī

toḌiye phir kyuuñ qafas ko kyuuñ rahā ho jā.iye

ālam-e-asbāb meñ paidā kiyā hai ḳhud mujhe

ḳhud taqāzā hai ki be-barg-o-navā ho jā.iye

aap kī āvāz meñ hai dāvat-e-manzil kā raaz

kārvān-e-shauq kī bāñg-e-darā ho jā.iye

hai fareb-e-rañg duniyā se ye tadbīr-e-gurez

sādagī-hā-e-mohabbat meñ fanā ho jā.iye

dījiye un ko kanār-e-ārzū par iḳhtiyār

jab vo hoñ āġhosh meñ be-dast-o-pā ho jā.iye

kyā ta.ajjub hai yahī ho un kā vaqt-e-ilitfāt

kyuuñ vafūr-e-yās se nāla-sarā ho jā.iye

ham to apnī be-ḳhudī-e-shauq meñ sarshār the

aap se kis ne kahā thā ḳhud-numā ho jā.iye

apnī sūrat meñ agar jalvagarī se hai hijāb

merī hī tasvīr meñ sūrat-numā ho jā.iye

parda-e-manzil meñ chhup-chhup kar tabassum kījiye

pā-shikasta kārvāñ kā aasrā ho jā.iye

ḳhud-baḳhud 'sīmāb' haiñ un kī nigāheñ multafit

hai ye vaqt-e-ḳhās masrūf-e-duā ho jā.iye

mahw ho kar be-niyaz-e-ma-siwa ho jaiye

un se jab mil jaiye sab se juda ho jaiye

KHalwat-e-gham ki KHamoshi mein fana ho jaiye

yun hayat-afroz-e-namus-e-wafa ho jaiye

muntaha-e-manzil-e-jaanan hai jab waraftagi

kyun na aawara misal-e-naqsh-e-pa ho jaiye

shart-e-azadi asiri jab musallam ho chuki

toDiye phir kyun qafas ko kyun raha ho jaiye

aalam-e-asbab mein paida kiya hai KHud mujhe

KHud taqaza hai ki be-barg-o-nawa ho jaiye

aap ki aawaz mein hai dawat-e-manzil ka raaz

karwan-e-shauq ki bang-e-dara ho jaiye

hai fareb-e-rang duniya se ye tadbir-e-gurez

sadagi-ha-e-mohabbat mein fana ho jaiye

dijiye un ko kanar-e-arzu par iKHtiyar

jab wo hon aaghosh mein be-dast-o-pa ho jaiye

kya tajjub hai yahi ho un ka waqt-e-ilitfat

kyun wafur-e-yas se nala-sara ho jaiye

hum to apnī be-KHudi-e-shauq mein sarshaar the

aap se kis ne kaha tha KHud-numa ho jaiye

apnī surat mein agar jalwagari se hai hijab

meri hi taswir mein surat-numa ho jaiye

parda-e-manzil mein chhup-chhup kar tabassum kijiye

pa-shikasta karwan ka aasra ho jaiye

KHud-baKHud 'simab' hain un ki nigahen multafit

hai ye waqt-e-KHas masruf-e-dua ho jaiye