KHizan ki tegh pe hai KHun-e-nastaran baqi

ḳhizāñ kī teġh pe hai ḳhūn-e-nastaran baaqī

abhī hai rañg-e-chaman nig.hat-e-chaman baaqī

badal gayā hai chaman meñ mizāj-e-lāla-o-gul

hai ik mujhī meñ tirī bū-e-pairahan baaqī

huā zamāna ki raste haiñ ishq ke vīrāñ

na rāh-rau hī koī hai na rāhzan baaqī

chale the chand qadam hī vo mere saath magar

hai aaj tak rah-e-ulfat meñ bāñkpan baaqī

fasāne kyā mirī vāraftagī ke taaza haiñ

nahīñ to zulf-e-butāñ meñ hai kyuuñ shikan baaqī

mujhī ko qadr-e-zamāna nahīñ hai ai 'maikash'

vagarna hai to zamāne meñ qadr-e-fan baaqī

KHizan ki tegh pe hai KHun-e-nastaran baqi

abhi hai rang-e-chaman nighat-e-chaman baqi

badal gaya hai chaman mein mizaj-e-lala-o-gul

hai ek mujhi mein teri bu-e-pairahan baqi

hua zamana ki raste hain ishq ke viran

na rah-rau hi koi hai na rahzan baqi

chale the chand qadam hi wo mere sath magar

hai aaj tak rah-e-ulfat mein bankpan baqi

fasane kya meri waraftagi ke taza hain

nahin to zulf-e-butan mein hai kyun shikan baqi

mujhi ko qadr-e-zamana nahin hai ai 'maikash'

wagarna hai to zamane mein qadr-e-fan baqi