husn ho gaya aaKHir ishq-e-raegan apna

husn ho gayā āḳhir 'ishq-e-rā.egāñ apnā

ban gayā nishāñ un kā miT ke har nishāñ apnā

maiñ jahāñ se uThThā huuñ zauq-e-rang-o-bū le kar

kyā huā jahāñ terā DhūñD ab nishāñ apnā

ibtidā-e-jāda par phir palaT ke aa pahuñchā

kāmyāb-e-manzil hai aaj kārvāñ apnā

har qadam uThātā hai un ke chashm-o-abrū par

un kā aadmī niklā mīr-e-kārvāñ apnā

kis tarh hue rusvā husn-o-'ishq kyā kahiye

husn un kā rāz-e-dil rāz-e-dil 'ayāñ apnā

hāl-e-ārzū kyā hai kyā batā.eñ ai 'maikash'

aañkh fitna-gar un kī dil hai be-zabāñ apnā

husn ho gaya aaKHir 'ishq-e-raegan apna

ban gaya nishan un ka miT ke har nishan apna

main jahan se uThTha hun zauq-e-rang-o-bu le kar

kya hua jahan tera DhunD ab nishan apna

ibtida-e-jada par phir palaT ke aa pahuncha

kaamyab-e-manzil hai aaj karwan apna

har qadam uThata hai un ke chashm-o-abru par

un ka aadmi nikla mir-e-karwan apna

kis tarh hue ruswa husn-o-'ishq kya kahiye

husn un ka raaz-e-dil raaz-e-dil 'ayan apna

haal-e-arzu kya hai kya bataen ai 'maikash'

aankh fitna-gar un ki dil hai be-zaban apna