tum par hi tabiat hai uftad tabiat ki

tum par hī tabī'at hai uftād tabī'at kī

tum se hī mohabbat hai taqdīr mohabbat kī

dīvāna huuñ maiñ phir bhī ġhairat hai sharāfat kī

lekin tire ġhusse meñ hai shaan muravvat kī

tum aur ho āmāda is tarh tarahhum par

qismat meñ tabāhī thī nākām-e-mohabbat kī

dil ne bhī tumheñ taakā tum ne bhī jalāyā dil

dil ne bhī qiyāmat kī tum ne bhī qiyāmat kī

taqsīr jo pūchho to mere hī junūñ kī hai

tum ne jo sharārat kī hai 'umr sharārat kī

kuchh dekh ke 'maikash' kī ulfat kā yaqīñ karnā

har baat meñ shoḳhī hai is riñd-tabī'at kī

tum par hi tabi'at hai uftad tabi'at ki

tum se hi mohabbat hai taqdir mohabbat ki

diwana hun main phir bhi ghairat hai sharafat ki

lekin tere ghusse mein hai shan murawwat ki

tum aur ho aamada is tarh tarahhum par

qismat mein tabahi thi nakaam-e-mohabbat ki

dil ne bhi tumhein taka tum ne bhi jalaya dil

dil ne bhi qiyamat ki tum ne bhi qiyamat ki

taqsir jo puchho to mere hi junun ki hai

tum ne jo shararat ki hai 'umr shararat ki

kuchh dekh ke 'maikash' ki ulfat ka yaqin karna

har baat mein shoKHi hai is rind-tabi'at ki