ye bhi ji chura baiThi bar-e-gham uThane se

ye bhī jī churā baiThī bār-e-ġham uThāne se

ziist de ga.ī dhokā maut ke bahāne se

fitrat-e-mohabbat kā rañg hī nirālā hai

yaad aa.e jaate haiñ aur vo bhulāne se

nā’ra-e-anal-haq se ham to sirf ye samjhe

baat thī chhupāne kī kah ga.e zamāne se

paḌ ga.ī haiñ buniyādeñ har jagah nasheman kī

gir ga.e the kuchh tinke mere āshiyāne se

aap ho ga.e nālāñ maut hoga.ī āsāñ

ḳhatm ho gayā tūfāñ dil ke Duub jaane se

ḳhud se be-ḳhabar hokar dil se ek sajda kar

bandagī nahīñ hotī sirf sar jhukāne se

dostoñ se ai 'mai-kash' be-ruḳhī kā shikva kyā

rasm hī mohabbat kī uTh ga.ī zamāne se

ye bhi ji chura baiThi bar-e-gham uThane se

zist de gai dhoka maut ke bahane se

fitrat-e-mohabbat ka rang hi nirala hai

yaad aae jate hain aur wo bhulane se

na’ra-e-anal-haq se hum to sirf ye samjhe

baat thi chhupane ki kah gae zamane se

paD gai hain buniyaaden har jagah nasheman ki

gir gae the kuchh tinke mere aashiyane se

aap ho gae nalan maut hogai aasan

KHatm ho gaya tufan dil ke Dub jaane se

KHud se be-KHabar hokar dil se ek sajda kar

bandagi nahin hoti sirf sar jhukane se

doston se ai 'mai-kash' be-ruKHi ka shikwa kya

rasm hi mohabbat ki uTh gai zamane se