دو چار ہی رندوں پہ نظر تیری پڑی ہے

دو چار ہی رندوں پہ نظر تیری پڑی ہے

اے ساقیِٔ دوراں میرا دامن بھی تہی ہے

خود رائی کا الزام بھی لگتا ہے مجھی پر

اور جبر مشیت میں بھی میری ہی خوشی ہے

اعجاز تو دیکھو مری گم کردہ رہی کا

خود منزلِ جاناں بھی مجھے ڈھونڈرہی ہے

ممنون ہوں ان کی نگہِ سوزِ اثر کا

اک آگ سی سینے میں لگی چھوڑ گئی ہے

وہ بول رہے تھے کہ یہ دل بول رہا تھا

ان کی سی ابھی دل نے اک آواز سنی ہے

سورج میرے خوابوں کا چمکنے کو ہے میکشؔ

امید کی ہر سمت کرن پھوٹ رہی ہے