do chaar hi rindon pe nazar teri paDi hai

do chaar hī rindoñ pe nazar terī paḌī hai

ai sāqī-e-daurāñ merā dāman bhī tahī hai

ḳhud-rā.ī kā ilzām bhī lagtā hai mujhī par

aur jabr-e-mashiyat meñ bhī merī hī ḳhushī hai

e'jāz to dekho mirī gum-karda rahī kā

ḳhud manzil-e-jānāñ bhī mujhe DhūñDh rahī hai

mamnūn huuñ un kī nigah-e-soz-asar kā

ik aag sī siine meñ lagī chhoḌ ga.ī hai

vo bol rahe the ki ye dil bol rahā thā

un kī sī abhī dil ne ik āvāz sunī hai

sūraj mere ḳhvāboñ kā chamakne ko hai 'mai-kash'

ummīd kī har samt karan phuuT rahī hai

do chaar hi rindon pe nazar teri paDi hai

ai saqi-e-dauran mera daman bhi tahi hai

KHud-rai ka ilzam bhi lagta hai mujhi par

aur jabr-e-mashiyat mein bhi meri hi KHushi hai

e'jaz to dekho meri gum-karda rahi ka

KHud manzil-e-jaanan bhi mujhe DhunDh rahi hai

mamnun hun un ki nigah-e-soz-asar ka

ek aag si sine mein lagi chhoD gai hai

wo bol rahe the ki ye dil bol raha tha

un ki si abhi dil ne ek aawaz suni hai

suraj mere KHwabon ka chamakne ko hai 'mai-kash'

ummid ki har samt karan phuT rahi hai