kaif se mamur hai mera shabab-e-zindagi

kaif se mā'mūr hai merā shabāb-e-zindagī

chashm-e-sāqī se kiyā hai iktisāb zindagī

aa ga.e tum dil meñ sab jaatī rahīñ tārīkiyāñ

jaise raushan ho gayā ho āftāb-e-zindagī

un ke istifsār par āñkhoñ se do aañsū gire

ham ne un ke sāmne rakh dī kitāb-e-zindagī

dil hī duniyā dil hī 'uqbā dil hī fitrat dil hī 'ishq

sirf do lafzoñ kā majmūa hai bāb-e-zindagī

jitne the behosh sab aane lage haiñ hosh meñ

baT rahī hai aaj mahshar meñ sharāb-e-zindagī

tishna rah jaa.e na dars-e-dard-e-be-tābī koī

khol de ai iztirāb-e-dil kitāb-e-zindagī

haiñ mirī ḳhāmoshiyāñ kaafī shab-e-furqat mujhe

kyuuñ sitāre chheḌ dete haiñ rubāb-e-zindagī

ye dil-e-'maikash' azal meñ jaane kis hālat meñ thā

ban gayā hai zindagī pākar 'azāb-e-zindagī

kaif se ma'mur hai mera shabab-e-zindagi

chashm-e-saqi se kiya hai iktisab zindagi

aa gae tum dil mein sab jati rahin tarikiyan

jaise raushan ho gaya ho aaftab-e-zindagi

un ke istifsar par aankhon se do aansu gire

hum ne un ke samne rakh di kitab-e-zindagi

dil hi duniya dil hi 'uqba dil hi fitrat dil hi 'ishq

sirf do lafzon ka majmua hai bab-e-zindagi

jitne the behosh sab aane lage hain hosh mein

baT rahi hai aaj mahshar mein sharab-e-zindagi

tishna rah jae na dars-e-dard-e-be-tabi koi

khol de ai iztirab-e-dil kitab-e-zindagi

hain meri KHamoshiyan kafi shab-e-furqat mujhe

kyun sitare chheD dete hain rubab-e-zindagi

ye dil-e-'maikash' azal mein jaane kis haalat mein tha

ban gaya hai zindagi pakar 'azab-e-zindagi