mujhko barah-e-rast jamal apna dikha de

mujh ko barāh-e-rāst jamāl apnā dikhā de

ai husn bas ab qaid hijāboñ kī uThā de

ye soz-e-mohabbat mujhe yuuñ aur mazā de

vo aa.e aur āhista se dāman kī havā de

ai mashq-e-tasavvur na nazar aa.e koī ġhair

har chiiz ko is shoḳh kī tasvīr banā de

dil soz pe maa.il hai nahīñ ḳhvāhish-e-taskīñ

ai dard ġham-e-dost ḳhalish aur baḌhā de

kyuuñ dil pe nazar Daalī thī kyuuñ pher liiñ āñkheñ

kab maiñ ne kahā thā ki lagā aur bujhā de

dekhā hai bahut aag lagāte hue 'mai-kash'

aisā bhī koī hai jo lagī dil kī bujhā de

mujh ko barah-e-rast jamal apna dikha de

ai husn bas ab qaid hijabon ki uTha de

ye soz-e-mohabbat mujhe yun aur maza de

wo aae aur aahista se daman ki hawa de

ai mashq-e-tasawwur na nazar aae koi ghair

har chiz ko is shoKH ki taswir bana de

dil soz pe mail hai nahin KHwahish-e-taskin

ai dard gham-e-dost KHalish aur baDha de

kyun dil pe nazar Dali thi kyun pher lin aankhen

kab main ne kaha tha ki laga aur bujha de

dekha hai bahut aag lagate hue 'mai-kash'

aisa bhi koi hai jo lagi dil ki bujha de